L'amicissia no la g'a confini, come quéla co' el nostro amigo Benê, nata nel lontàn domìla. Grassie a lu l'è partìa la redassión brasiliana e tuti i nostri studi su la granda emigrassión veneta in Brasìl. Par la prima 'òlta semo riussìdi a incontrarse e darse un bel strucón soto l'ala de la nostra Rena.. Come podémo dir in póche parole cosa se pól provàr in quéi momenti? No gh'è 'bastansa parole soratuto parché el nostro amigo rivà co' tuta la so faméia el g'a volù farne la sorpresa, el s'a presentà in Veneto sensa dirne gnénte. Una bèla sorpresa da farte restàr co' la bóca vèrta! Benê l'è uno dei grandi odontoiatri de l'ospedàl de San Paolo e ben conossù a livèl nassionàl, no te dà l'idea de èssar un importante professór, parché la so umiltà, la so gentilessa e la so sensibilità, scancela la distansa co' la zénte comune drénto e fóra de l'ospedàl, co' dotori, studenti e co' ci stà mal. Par quésto in Brasìl tuti i ghe vol bén e par quésto quél strucón soto la Rena g'avéa drénto no solo la nostra storia ma anca quéla dei nostri noni, partìdi co' le valìse de cartón 150 ani fa da le tère venete par sognàr un mondo manco pitòco. Internet se utilisà ben pol portarte çèrte emossioni e farte conóssar parsone straordinarie. (La Redassión 23.05.2023).
