ISOLA DE LA SCALA (Isola della Scala)
Popolassión: 11.536 Altessa: 31 metri sóra el livèl del mar Superfice: 69,83 chilometri quadri Comùni confinanti: Butapiéra, Opeàn, Boolón, Salizol, Nogara, Erbè, Traensól (Trevenzuolo), Vigasi.
Comùn de la Bassa Veronese a 20 km da Verona in diressión sud e posissionà lóngo el fiume Tartaro. Isola l'è abità fin da l'antichità come i ne dimostra i reperti de l'Età del Bronso catadi al Molin Giarela, mentre in epoca romana l'éra travérsà da la Via Claudia Augusta che partendo da Ostiglia e passando par Verona la menàva verso nord; e pròpio de 'sto periodo jè le monéde, medaje e lapidi scoèrte nel teritorio isolan. Nei primi documenti del X secolo compare el nome de Insula Cenensis dal latin caenum "fango"; in pratica l'éra 'na zona isolà con intorno le "Paludes Tartari fluminis" descrite da Tacito e Plinio, corispondenti a le atuàli "Grandi Valli Veronesi". 
In epoca comunàl el paese el se ciamava Isola dei Conti parché l'éra a le dipendense dei conti, forsi Sambonifacio, mentre sóto la dominassión Scaligera l'è nata l'atuàl denominassión. A guardia del Tartaro el bón Mastino II De la Scala nel XIV secolo, l'à fato costruìr la tór Scaligera, che faséa parte de l'opera difensiva ciamà "Serajo", un grande murajón che partendo da Valéso e passando da Vilafranca el finiva a Nogarola Roca. Dopo i periodi Visconteo e Cararese a l'inissio del XV secolo l'è stà el turno dei Venessiani; Isola l'éra a capo de uno dei vicariadi e ànca sóto le pressioni de la Serenissima de impór el nome Isola San Marco i abitanti i à sempre mantegnù el vècio toponimo. Nel 1462 Tarmassia l'è stà consegnà ne le mane dei Malaspina che i vansava un credito dal Comùn. Nel 1509 durante la guera dei Venessiani contro la Lega de Cambray, el conte Girolamo Pompei l'éra riussì a far prisonier a Isola, Francesco II de Gonzaga e dopo avérlo portà a Venessia, ghe stà regalà come premio el Castèl de Ilasi; la vendeta parò l'è rivà da parte dei soldà francesi copando zente e tacandoghe fogo al paese.
Nel 1524 su inissiativa dei frati Zoccolanti de l'Ordine dei Minori de San Francesco l'éra stà costruido el Monte de Pietà restà in atività fin al 1949 quando l'è stà sopresso dal Ministero del Tesoro. Nel XVI secolo el Comùn de Isola l'à bèn pensà de scrivarse dei Statuti e podéa vantar dei diriti su la pesca nel Tartaro, sul pascolo e sul pedajo sul ponte de la tór Scaligera. Nel teritorio isolan s'à 'isto l'emigrassión de un poche de nobili faméje su consenso de la Serenissima e la costrussión de numaròse vile.
Nel XVII secolo j è stà bonificà le paludi e l'è scomincià la famosa coltivassión del riso. Dopo la Republica de Venessia l'è rivà a la fin del '700 Napoleón, con Isola a le dipendense del Distreto de Vilafranca mentre ne l'800 sóto i austriaçi l'éra a capo de un Distreto con poter su Bovolón, 
Isola Rissa, Salissol, Opeàn, Ronco, Nogara, Erbè, Sorgà e Travénsol fin al 1866 quando l'è deventà Italiana. Tra le cése da visitàr a tuti i costi, l'è el Santuario de la Madona de la Bastia, ceséta romanica del 1126 con portal del XVI secolo, la conserva drénto afreschi del 500, 'na statua de la Madona venerà dai isolani, un aquasantiera del '400, mentre fóra, su la fassàda, gh'è n'iscrissión murà, con sóra i nomi de ci l'à costruì e l'ano de costrussión. N'altra interessante cèsa l'è quèla parochiàl dedicà ai Santi Stefano e Giacòmo, antica pieve documentà dal 1011 e ricostruida nel XVI secolo; la conserva un bèl batistero otagonàl in marmo rosso con bassorilievi con rapresentà Gesù Cristo, la Vergine e l'Angelo Gabriele con altri santi e 'na tela del Giolfino oltre tri pale de Carlo Ridolfi con el processo, el martirio e la sepoltura de San Stefano mentre el campanìl del 1411 el g'à la base in tufo del 1130.
La parochiàl de Tarmassia dedicà a San Giorgio la conserva du pale una del Brusasorsi e l'altra del Farinati. Tra le vile da 'édar gh'è la Pindemonte de l'omonima faméja che la gavéa possedimenti fin a Setimo de Galese a Butapièra; l'è stà costruida nel 1742 su progeto de Alessandro Pompei con statue de le divinità del Muttoni. Inoltre Vila Guarienti e Corte Nogarola a Tarmassia del '500, Vila Pellegrini a Pelegrina del XVI secolo,Vila Boschi in stile Veneto costruida dai Conti Brà nel 1747, Vila Zénobio del '700, Corte Schioppo del' 500 con Oratorio de Santa Margarita del '600, Corte Rivanello de la faméja Rivanelli che g'avéa propietà a Isola dal 1275, Corte Palazzina del 1584 costruida da la faméja Magnini e Corte Mandello in quèla che 'na 'òlta l'éra ciamà Valmercaldo. E alora ne resta che magnarse un bòn piato de Risóto a l'Isolana, col "Riso Vialón Nano" e far un giro tra le vèce "pile" e le risorgive.
El Santuario de la Bastìa
La césa de la "Madona de le Grazie" conossù anca come el Santuario de la Bastìa, se cata no tanto lontàn dal paese de Isola de la Scala, 'ndóe un tempo ghe passàva el fiume Tartaro, che laorando el terén, l'è riussì a sagomàr e sbassarlo, come quél tacà del Piganzo. In 'sto lógo 
prima che fusse spostà el fiume, se catàva el "castrum" e in epoca venessiana una fortificassión co' denànsi dei pài de legno ciamà "Bastìa". Sora un tòco de piéra a sànca del portàl de la fassàda, catémo l'ano de costrussión, 1126 e ci g'a deciso de farla su, Chebizo Wariento et Anno, nomi che catémo anca ai pié del campanìl de la parochiàl.
Forsi la césa l'è stà fata su da nóvo dopo el teremoto del 1117, parché fatalità catémo dei "bassorilievi" in fassàda de epoca longobarda o forsi carolingia del VIII-IX secolo. Soto ai venessiani, la césa l'è stà brutalmente modificà come la védemo al dì de ancó, da tre navàde semo passà a una, el corpo de mèso sbassà e le ale da le parte alsà creando un quèrto a capana, sensa contàr che l'è stà vèrto un rosón e realisà un nóvo portàl in stile rinassimentàl tiràndo via parò el protiro romanico. Nel '500 l'éra in gestión a un capelàn volù da la faméia veronese dei Panteo, paroni de le tère lì tachè. 
E propio da quéle parti gh'éra un convento e un ospedàl par pelegrini come dito dal vescovo G.M. Giberti ne le so visite pastorali dal 1526 al 1541 "ecclesie Sanctae Mariae a Bastia nuncupata de l'hospitale". 'Péna te méti i pié drénto in césa te pól védar una aquasantiera in marmo rosso con sóra scrito RAINERIUS SINDICUS ET MASSARIUS FECIT FIERI DE MCCCXII e i muri piturè, scoèrti dopo i restauri del 2012, co' sóra la Madona co'l Butìn del '500. Su la paréde a sanca, gh'è un altàr co' un nicia, 'ndóe un tempo gh'éra la statua de la Madona, spostà su l'altàr magiór, invésse su la paréde a destra gh'è un altàr con mensa in legno e un dossàl disegnà sul muro, ciamà "del Crocefisso" par la presensa de la pala co' el Crocifisso fra angeli, la Madona e Zuàne; se te vardi in basso gh'è i Santi Lorenso, Carlo Borromeo e Antonio Abate.
Da le parte del presbiterio catémo i posti in legno par quéi del coro, lógo piassè alto de un scalìn respèto el resto de "l'aula" serà da un abside a base squadrà. Tra el 1965 e 'l 1975 la mensa con palioto del’antico altàr magiór in legno, l'è stà sistemà piassè 'vanti sul piàn rialsà del presbiterio secondo le prescrissioni liturgiche del Concilio Vaticano II. De drio, ne l'abside, catémo l'altàr piassè importante, un "polittico ligneo" 
del '500 tacà al muro, realisà a tempio con tre cèle separà da colone scanelà e dorà, co' sóra dei panèi intajè e piturè ai pié, co' sène de la vita de Gesù invésse ne la parte alta gh'è altri tre panèi co' la colomba del Spirito Santo e de le figure sacre; sul timpano gh'è el Pare Eterno co' i cherubini.
Nel tabernacolo gh'éra tre statue in legno, quéle de la Madona e quéle de Simone e Giuda ciavà nel 1980. Nel 2008 dopo un restauro l'è stà ciapà la Madona co' Butìn sui zenòci in teracota da l'altàr de sànca de la césa e sistemà ne l'altàr magiór. La venerassión par la statua l'a portà i fedeli a ciamàr la césa anca co' el nome de "Madona de le Grazie". Rainerus, sindaco e massaro de Isola de la Scala oltre a l'aquasantiera el g'a volù tiràr su el campanìl che a quéi tempi l'éra a sànca de l'entrada e nei ani çinquanta del '900 butà zò e ricostruido da la stessa parte ma a nord del'abside, fato in quarèi e con quatro fenèstre a tuto sèsto ne la çèla campanaria e coi penaci e le crose sui cantoni e su la pònta. Ancò iè presenti 5 campane in DO4, montà a la veronese.