Ferara

FERARA DE MONTE BALDO

Popolassión: 226 Altessa: 856 metri sóra el livèl del mar Superfice: 26,89 chilometri quadri Comùni confinanti: Brensón (Brenzone), Malsé∫en (Malcesine), Brentìn (Brentino-Belluno), Cavrìn (Caprino Veronese), S.Zén de Montagna, Avio TN

Ferara l’è posissionada sul versante orientàl del Monte Baldo, in una conca, quasi a mèsa costa tra la Val d’Àdese e le çime del Baldo. Ne la val, querta da magnifiche distese de conifere, spunta fora qua e là, le case residensiali par el turismo come i vilai Alpin, Albarè e Monte Cuco, sensa contàr le contrade Cambrigar, Campeèl, Casteléti, Dossi, Fraine de Sóra e Fraine de Sóto, Mèsavila e Portole. El nome de Ferara el deriva dai giaçimenti de fero che i romani i sfrutava ne la val. Ma le origini de Ferara i è ancora più antiche, se pensa che la prima forma de insediamento abitativo stabile el se sia verificado nel momento del passàio fra la condission nomade e quèla d’agregassion de ci se ocupa del bestiame e de l’agricoltura qualche milenio prima de Cristo.

Nel VI secolo el teritorio l’è passado sóto i Longobardi e un secolo dopo ai Franchi. Sul Monte Cuco i dise sia stà costruida un fortificassión "arce" par difendar i abitanti da le invasioni barbariche. Nel 1193 deventa comune con sede in Saùgol, poi in Campeèl e infine ‘ndóe l’è atualmente. El so teritorio par la so importansa strategica e aministrativa l’éra stà incluso ne la “fatoria scaligera”, cioè fra i teritori aministradi diretamente dai Scaligeri. Da documenti risulta che Ferara zà nel '500 l'ospitava viandanti e foresti, dimostrando una bèla vocasion turistica. Storicamente nel 1703 da Ferara, l'éra partido el Duca de Vendòme con quindesemila òmini in diressión de la çità de Trento nel tentativo, poi falido de conquistarla. El paese l'è stà ocupado nel periodo 1796-97 da eserciti francesi e austriaci che alternandose con vitorie, sconfite e sparatorie i à messo sóto sóra el paese e infine concluse con la conquista final de Napoleón dopo la vitoria de Riole.

Nel 1813 i francesi comandà da Eugenio de Beauharnais, vien messi in fuga da l'esercito austriaco  e costreti a ritirarse oltre el Mens (Mincio). Nel dugno 1848 le fa la so comparsa ànca le trupe piemontesi, che dopo essarse bèn difese contro quéle austriache, un mese più tardi le vegnarà definitivamente sconfite. De questo evento storico gh'è 'na testimoniansa a Malga Basiana dove gh'è un çimitero "Le Buse dei Morti" no molto grando, con i resti de çinque soldà de l'esercito piemontese e de tri de quél austriaco. Ne la prima guera mondiàl el teritorio de Ferrara l'è stà percorso da diversi reparti militari che i andava in diressión Monte Altissimo e Brentonico. In questo periodo el paese e i pascoli de le malghe, jè stà zone de acantonamenti militari, con conseguente interusion de tute le normali atività economiche. Ne la zona de Novesa (Novezza), a çima Redute e in tuta la zona tra Cerbiol, e Gambón se pól ancora 'édar le longhe trincee realisade da le truppe italiane. Jè particolarmente interessanti quéle de Novesa, 'ndóe se pól individuar varie struture de servisio e quéle de Gambon, scavade a tunel ne la pièra viva e paurosamente in fora e a strapiombo su la Valdadese. Sempre a testimoniansa de la presensa militàr italiana durante la Grande Guera l'è una fontanela d'aqua su la strada tra Saugol e Ime, con sóra scrita la data 1917. In località Peagne inveçe, se pól visitàr el Sacrario Provincial de i "caduti" veronesi de tute le guere con 98 lapidi messe a semiçercolo, una par ogni comune veronese.

Da visitàr l'è la Césa parochiàl de Santa Caterina d'Alessandria, zà parochia nel 1460, dipendente da la Pieve de Cavrin (Caprino). La césa originaria, de la quàl i resta l'abside e un çiclo de afreschi, l'éra stà ampliada ai inisi del 1600. Vissin a ela, nel'Otoçento, l'è stà realisada quèla atuàl su disegno del'ing. Don Angelo Gottardi: i laori i éra inissiadi nel 1870 e ultimati nel 1888; el 24 dugno del stesso ano la nóa césa l'è stà benedeta e 'l 9 lujo 1898 consacrà. I magnifiçi afreschi del presbiterio jè del Trentini, mentre i altri del Saoncella. La portesela del tabernacolo l'e' impreziosida da un' "Ultima çena" del pitór setecentesco G.Battista Lanceni. Le tri campane jè del 1846. Nel teritorio de Ferara, da visitàr assolutamente l'è el Santuario de la Madona de la Corona che parò se ghe riva da la frassión Spiassi del Comùn de Cavrìn. El santuario più "ardito d'Italia" el se cata tacà via a le rocie a strapiombo su la Val d'Àdese e rifato più 'olte nel corso dei secoli con l'atuàl fassàda de fine '800. El simbolo l'è una "Pietà" de marmo con la Madona col Cristo morto sui zenoci. La statua la presenta una scrita "Hoc opus fecit fieri Ludovicus de Castrobarco A:D. 1432" mentre secondo la tradissión l'è sparida nel 1522 da l'isola greca de Rodi, durante 'n ataco dei turchi e ricatada li' tra i sassi del Baldo. Documenti storiçi i dise che nel lógo "de la Corona" ancor prima de l'arivo de la statua gh'éra dei eremiti benedetini.

La césa l'è stà sgrandada 'isto l'alto nùmaro dei pelegrini da tuta Italia e nel 1985 da segnalàr, la visita de Papa Gioàni Paolo II. Da visitàr l'è ànca l'Orto Botanico de Novesina (Novezzina), in quanto, se pol catàr le specie botaniche del Monte Baldo denominado "Hortus Europae". Chi, se pól catàr una varietà ecessionàl floristica e floreale con esemplari de fiori uniçi nel mondo come la Anemone baldense, Galium baldense, Knautia baldensi. Infine da segnalàr che da Ferara parte numarosi sentieri che i porta a çime e località del Baldo come çima Telegrafo (2200 m), çima Valdrita (2218 m), Coalsanto (2075 m), Ponta de Naole (1659m) el Valón Osana, Malga Artilón, (1538 m), Passo del Cerbiól (1379 m), Caval de Novesa, Passo Campión. 

El Santuario de la Madona de la Corona

El Santuario de la Corona, se cata de sóto al paese de Spiassi, tacà su par 'na séngia, ai pié del Monte Baldo vardando dal de sóra la Val d'Àdese "su da na scala de mile scalini, tajà vivo e che sta su per un sogno" come diséa el poeta Berto Barbarani. Nei documenti l'è saltà fóra che a tórno a l'ano Mile, da le parti del Baldo, ghe vivéa dei Eremiti de l'Abassia de San Zén e che da la seconda metà del Dosènto gh'éra un monastero e una capèla dedicà a "Santa Maria de Montebaldo", che par visitarlo te dovéi far un sentiér stréto e pericoloso. Secondo tradissión la nàssita del Santuario de la Madona de la Corona l'è stà nel'ano 1522, quando la scultura qui venerà, sarìa stà miracolosamente "traslà" par "intervento angelico" da l'isola de Rodi dopo l'invasión mussulmana de Solimàn II. La cosa l'è pura fantasia, defàti, se vardémo la data del primo dipinto de la Madona co' el Butìn presente nel Santuario se vede che l'è fàto secondo stile del Tresènto, dipinto venerà ne la prima ceséta e che la g'a dà el nome al Santuario.

Tra el 1434 e el 1437 S. Maria de Montebaldo, l'è passà ai Cavalieri de San Zuàne, o del Santo Sepolcro, presenti a Verona dal 1362 come "Coménda de San Vitàl e Sepolcro" fin al 1806. Ai pié de la Pietà po' venerà come Madona de la Corona, statua in piéra veronese piturà, se lése “HOC OPUS FEClT FIERI LODOVICUS D CASTROBARCO D 1432”, òpara alta 70 schèi, larga 56 e fónda 25, regalà dal nòbile Lodovico Castelbarco. In questi quatro secoli la "Coménda" g'a canbià Madona de la Corona, passando da un ceséta a un vero e proprio Santuario, costruido de sóra grande 18 metri par 7 tra el 1490 e el 1521 e sistemando le strade par 'rivarghe, compreso el ponte de àsse a val nel 1458.

Nel '500 gh'è stà fato le do scale, quéla piassè granda de 556 scalini da la "Fonte de l'Indipendensa" de Spiassi al "Ponte del Tèio" e quéla piasse strèta da 234 scalini scavà ne la piéra fin al ponte de la césa. La nóva césa l'è stà costruì tra el 1625 e el 1685 quatro metri de sóra quéla vècia che l'è finìa ne la so pansa e de sóto al nóvo presbiterio.

Cossita in quel periodo grassie ai schèi del com.Tancredi, l'è stà costruìdo un ospìssio par i nùmarosi pelegrìni scavà ne la piéra.

In una magnifica incisión del 1750 de G.A.Urbani su comissión del retór Don Giuseppe Balbi, se pól édar come l'è sistemà tuto el complèsso sesan contàr i du inventari del 1724 e del 1744.

A la fine del '800 la césa l'è stà sgrandà da nóvo co' tanto de fassàda in stile gotico co' ricami de marmo, grassie ai progeti de l’arch. Giuseppe Magagnotti de Verona e de l’ing. Emilio Paor de Trento, laóri finìdi co' tanto de cerimonia de l'incoronassión de "l'Addolorata" el 17 setémbre 1899.

Póco dopo g'a pensà el scultór Ugo Zannoni a farghe le statue par le césa e la fassàda. Nel 1922 e quarto centenario de la comparsa de la statua de l'Addolorata, gh'è stà fàto da nóvo el campanìl lóngo e sutìl a pónta e sistemà la strada co' tanto de galerìa su disegno de l'ing. Federici.

Finìa la seconda guèra mondiàl el retór Don Sandrini el g'a fato slargàr la césa a l'arch. Banterle ne la parte presbiterio.

Nel 1974 l'arch. Guido Tisato g'a fato un progeto par sistemàr tuto el complèsso, butàndo zò la césa, tegnéndo le parti piassè importanti ma faséndola su da nóvo piassè granda, laóri fati tra el 1975 e el 1978

El 4 dugno del 1978 el Vescovo Giuseppe Carraro el g'a consacrà la césa co' el so nóvo altàr. Nel 1982 al Santuario gh'è stà dato el titolo de “basilica minór”. El 17 aprìl 1988 Papa Giovanni Paolo II el g'a fato visita.

Da segnalàr le sculture de Ugo Zannoni, quéle del 1900 co' San Zuàne Vangelista e Santa Maria Madaléna presenti ne la fassàda e la Addolorata ne la nìcia de le confessioni, quéle scopide tra el 1912 e el 1913 co' San Zuàne e quéle dei santi patroni dei Cavalieri de Malta, Santa Toscana e San Zuàne Batista; le 14 formèle de la Via Crucis sui pilastri de la navada çentràl del Santuario e le formèle in gesso dei sète dolori de la Madonna, 'dèsso ne la Capèla del’Adorassión; del 1916 iè l’Ecce Homo e i du Angeli che catémo ne la Capèla dele Confessioni; del 1919 l'è l’altorilievo del’incontro de Cristo con so Mama.

Passémo a un altro artista, lóngo la strada podémo catàr le òpare in brónso de l'arch. Raffaele Bonente, particolari come quéle sul muro de l'abside a tòrno a la Pietà, 'ndóe se véde una corona de spini e i angeli. El "paliotto" de l'altàr se presenta co' trè formèle in brónso coì la Natività, la Croçefissión e la Pentecoste, separà da quatro lesène dedicà ai Vangelisti; ai lati do formèle dedicà a la césa veronese, invésse la parte de drio l'è divisa in tre "campiture", con ai lati du invocassioni mariane e al çéntro el cór de la Madonna infrincià da sète spade; i 6 candelabri sula mensa con i simboli dei Vangelisti e simboli alegorici; la formèla de l’Anunciassión, su "l'ambone" e el leturìn co' i simboli dei quatro Vangelisti, le fàçe de Abramo, Mosè, Davide e Isaia, e al çéntro el "monogramma" de Cristo; el tabernacolo del 1982 con le quatro figure in brónso co' la fede, la speranza, la carità e la religión; el batistèro del 1988 che presenta ne la parte de sóto 8 péssi e la parte de sóra, i sète regài del Spirito Santo; el medaión ricordo de la visita papale, dal 1993 sistemà de fóra del Santuario; le vetrade ne la navàda destra del Santuario co' i misteri del Rosario; gh'è anca le sculture e le vetrade de la capèla del’Adorassión fate nel 1990; le statue in brónso de le stassioni dela Via Crucis lóngo la strada che da la residensa “Stella Alpina” finisse al Santuario.

Come émo visto le òpare del Bonente iè tante come i ex-voto che catémo lóngo el muro a destra del Santuario, co' quasi 170 taoléte, grandi e picenine; una in particolàr del 1547 la parla de una dòna che par un pél la ris-ciàva ne negarse ne l'Àdese a Verona. Anca al comunità de Bardolìn g'a controbuìdo co' na tela bèla granda par la grassia de la pióva. Quél, che par tanti l'è, el piassè bèl, l'è una tela co' el Cristo a la Colona, del pitór Antonio Balestra del 1724.

Par ci vól far fadìga, mèio partìr da Brentìn e farse a pié 2,5 km de scalini. Par ci l'è un pantàsso, da Spiassi de Cavrìn parte el pulmìn par el Santuario. In ogni caso, un giro a Madona de la Corona bisón farlo ne la vita! Par ci vól far fadìga, mèio partìr da Brentìn e farse a pié 2,5 km de scalini.

Un ultima precisassión, el Santuario se cata nel Comùn de Ferara e la strada par rivarghe la parte da la località Spiassi, località divisa tra i Comuni de Cavrìn (in bóna parte) e de Ferara. El Diretór