CONCAMARISE
Popolassión: 1.077 Altessa: 21 metri sóra el livèl del mar Superfice: 7,91 chilometri quadri Comùni confinanti: Salizòl (Salizzole), Boolón, Zerèa (Cerea), Sanguiné (Sanguinetto).
Storicamente, de 'sto comune de la Bassa Veronese no g'avémo notisie prima del XII secolo, quando vien citado in un documento de l'imperadór Corado III nel 1144 tra i possedimenti de l'Abate de Nonantola "Cum Camarisa". Su l'origine del toponimo Concamarise g'avémo varie versioni, come quèla che podarìa derivàr da na conchilia del mar "Choncamaris". Se analisemo la parola "conca" la vien usada nel Veneto par indicàr un qualcosa de scavà in modo naturàl, come quél che podarìa provocàr un corso d'aqua su 'n terén, in pratica 'n "incavo". Nel 1225 un vilàio 'ndóe ghe atuàlmente Corte Verità, l'éra posissionà "in capo al ponte di pietra" e quindi da 'ste parti gh'éra un progno o fiume. L'altra parola da ciapàr in considerassión l'è "lama" e le relative derivassioni "lamàra e lamàr" voçe veneta par dir stagno, aqua ferma, palude o come da documenti venessiani nel senso de "fossa".
Quindi podarìa risultar, zontàndoghe l'agetivo, la parola "lamarése". In pratica la spiegassión piassé logica, l'è che da 'ste parti gh'éra 'na zona che l'éra impaludà a causa de questa conca nel terén "Conca Lamerése". Storicamente Concamarise, deventa comune autonòmo nel 1225 come scrito nei documenti del XIII secolo. In 'sto periodo a Concamarise catémo importanti faméje nobili, come i conti Da Palazzo esiliadi da Verona che i g'avéa de le propietà da 'ste parti. Propietà confiscade a causa de l'esilio dal Comùne de Verona, sensa contàr le confische precedenti nel XIII da parte dei "amiçi" conti Sanbonifacio e nel 1247 da parte de Eselìn da Romàn. Ma la faméja piassé importante de 'sto comun l'è stà quèla dei conti Verità a partir dal XV secolo sóto el governo dei Cararesi che col tempo l'è deventà un simbolo a Concamarise. Nel XVII secolo la faméja Malaspina l'à eredità el possedimento de quèla che ancò vien ciamada Vila Lasise. Ne l'800 inveçe, l'è rivà ànca la faméja Montanari. Nel 1929 Concamarise vien incorporà a Sanguinè par restàrghe fin al 1948. Al dì de ancò el paese el se presenta diviso in do çentri abitadi, el primo 'ndóe gh'è el çentro antico con la vècia césa parochiàl, le vile Lasise e Verità mentre el secondo lo catémo al de là del corso d'aqua del Sanuda con la frassión Capitel (gh'è la sede comunàl, la noa parochiàl e le scole). La vècia césa dedicada ai Santi Lorenso e Stefano l'è stà restaurada in modo consistente nel XVIII secolo con el contributo dei conti Verità, ma le so origini jè antiche parché la risulta tra i possedimenti del monastero de Nonantola nel XII secolo e deventà parochia nel 1460.
Le opere piassé importanti de la vècia césa, el fonte batesimal in marmo rosso e le do pale con rafigurà i Santi Antonio da Pàdoa, Carlo Boromeo e Francesco d'Assisi de G.B. Amigazzi e 'l Redentór con i Santi Stefano e Lorenso jè stà spostade ne la noa césa nel 1958. Poco distante gh'è l'antica residensa dei conti Verità dal XIV al XVII secolo, un tempo fortificada e trasformà in residensa de campagna de la faméja con davanti un bèl parco con lagheto. El paese l'è conossù sóratuto par la coltivassión del tabaco oltre che par la produssión e l'antiquariado del mobile d'arte.
