CASTAGNARO
Popolassión: 3.750 Altessa: 14 metri sóra el livèl del mar Superfice: 34,80 chilometri quadri Comùni confinanti: VilaBartolomea, Terasso, Badia Polesine Ro, Giacciano con Baruchella RO
Le origini de Castagnaro jè antiche come ne pól testimoniàr i resti de vilagi preistorici catadi in questo teritorio. Nel periodo romano la strada consolar Emilia-Altinate la travèrsava la zona e i abitanti i éra specialisadi ne la produssion de quarèi tanto da deventàr famosi in tuto l'impero infati nel comune gh'éra sparse qua e la un bèl mucio de fatorie e fabriche con fornase. Ne la frassión Menà jè stà catade verso la fin del 1800 bèn 1258 monete romane tra "denari" e "quinari", pochi ani dopo altre 1031 oltre a resti de anfore e quarèi. Dopo le invasioni barbariche le stà la 'òlta de la famosa piéna de l'Àdese che provocando la "Rotta della Cucca" nel 589 d.C. (toponimo de Veronèla), l'à spostado a sud e in questo teritorio el corso del fiume, sensa contàr che bòna parte de 'sta zona l'è stà somersa da fango, deventando palude e butando zo albari, tra questi un bèl pochi de "Ipocastani" che i querzea Castagnaro. Dopo questa serie de problemi se vede la nàssita de do località, le future Menà (l'atuàl frassión) e Castagnaro (l'atuàl comune) in zone più riparade da eventuali piéne. In epoca medievàl gh'éra el Canal Castagnaro in grado de unir l'Àdese al Tartaro utile par el trasporto de mercansie fin al mar Adriatico.
L' ondese marso del 1387, durante la dominasion scaligera, ne le campagne de Castagnaro ghe stà una de le batàje più grosse de la storia veronese contro i Padovani; 40.000 soldà in tuto, 4600 prigionieri scaligeri e relativi capitàni. Dopo avér perso, el 19 april 1387 Verona passa ai Visconti e tramonta la signoria Scaligera. Dopo Napoleón da 'ste parti jè passadi ànca i austriaçi armadi ànca de bòna vólontà. L'è pròpio grassie a lori, che scomincià l'opera de bonifica, lo svilupo economico e agricolo oltre a l'introdussión dei "Cavaleri". In più l'è stà costruido el Canal Emissario e sul Ponte Rosso una lapide ricorda 'sta opera: "Questi luoghi natura da secoli impaludò, arte in pochi anni redense". Da visitàr assolutamente la cèsa parochiàl del 1822 costruida su n'altra de origini medievàl, 'ndóe ghe custodì de drio l'altàr una pala del pitór Brusasorzi che rafigura la Madona col butin, San Nicola e San Gioàni Batista; un San Francesco de la Scóla del Moretto del 1500; un magnifico afresco de San Nicola sul sofito e infine 'na statuta de la Madona del 1838.
Inveçe ne la frassión Menà, la cinquecentesca ceséta dedicada a Sant'Ana vóluda dai Monaci Benedetini de Ferara la se presenta drénto, con dei magnifici afreschi de la Scóla dei Caroto. Nel teritorio se pól contàr ànca numaròse case coloniche rurali (in bòna parte serade) de propietà de conti o signori de la zona apartegnude un tempo a faméje veronesi importanti, Dal Verme, Donà, Fracanzani, Rangoni, Sacrati, Trotti, Barbarigo, Fiocco, Grechi. Tra i esempi de vila rurale gavemo Vila Bianchini con una bèla "giazara" drénto al parco e Vila Grechi. Importanti par la comunità de Castagnaro, jè ànca, par storia e tradissión, i "sete capitei", ceséte 'ndóe se celebra ancora al dì de ancò le funsioni religiose.
