BOVOLÓN - BOOLÓN - BOGOLÓN (Bovolone)
Popolassión: 15.888 Altessa: 24 metri sóra el livèl del mar Superfice: 41,27 chilometri quadri Comùni confinanti: Salizòl, Concamarise, Isola de la Scala, Opèan, Isola Riza, Zerèa, San Piéro de Morubio.
Comùn de la Bassa Veronese a 24 chilometri da Verona, posissionà con la frassión Vilafontana in un teritorio travérsà da nord a sud dal fiume Menago. L'òmo l'è presente da 'ste parti fin da la preistoria come pól dimostràr i reperti scoerti nel 1876 ne la "necropoli" de località Prà Castèl e in tuto el teritorio de Boolón de la çiviltà "teramaricola", vegnù nel veronese a cavàl tra l'Età del Fero e del Bronso, nel 2500 a.C. çirca. Prima dei romani a Boolón jè passadi i Atestini, i Etruschi nel VI secolo a.C. e i Gai Cenomani nel IV secolo a.C. El primo documento scrito su Boolón l'è del 24 dugno 813, un "previlegio" del Vescovo Ratoldo conossù come "pagina firmitatis" che podéa distribuir in quatro parti "aequalis" (Vescovo, Clero, pitochi e Fabriche de la Chiesa) el guadagno del feudo de Boolón; nel tempo Imperadori, Vescovi e Papi i à confermà al Vescovo de Verona i antichi privilegi de "Conte de Boolón" fin a tuta l'epoca Venessiana.
Quando l'è rivà la nova organisassion comunàl, Bovolón, l'à scomincià a sviluparse, cossita el Vescovo par no perdar el so poter l'éra andà a dimandar aiuto prima a l'imperadór e dopo al "furbo" Comùn de Verona che 'isto la situassion l'à messo le mane sul paese lassandoghe i vèci diriti vescovili come sucesso al Vescovo de Verona Norandino a l'inissio del '200. In località Crosare verso la metà del XII secolo l'è stà costruì un castèl come scrito nei documenti del 1154 e del 1178 "Castrum de Bodolone" deventà el çentro çivil e aministrativo del paese. A la fin del XII secolo grande svilupo agricolo e conferma inveçe par el comercio e sóratuto s'à 'isto 'na bèla cressita economica, mentre a l'inissio del XIII, jè scomincià i laori par incanàlar in qualche maniera, el Menago, che'l corea libaro par Boolón.
Da segnalàr che nel 1287 e nel 1313 no gh'éra da magnàr e nel XIII secolo da 'ste parti s'à 'isto ànca le lote tra guelfi e ghibelini che jà messo sóto sóra el paese, come nel 1233, quando i mantoani amiçi de Rizzardo de Sambonifacio i gà tacà fogo par dar dispeto a Eselìn da Romàn. Boolón in 'sto secolo l'è stà sempre in mèso a le guere, prima par colpa dei soldà bressiani e mantoani nel 1234 e dopo par colpa de la riolta del 1269 de Pulcinela Da le Carceri e Lodovico Sambonifacio contro Mastino I De la Scala. In quél periodo, da segnalàr la nàssita de la Fiera de San Biagio nel 1278, mentre pochi ani prima la fondassion de l'Ospedal de San Daniel grassie a 'na donassión de Donna Verde, moiér de Alberto De la Scala e mare de Cangrande. Nel 1401 da segnalàr l'inissio del gran laoro de costrussión dei arzari del Menago finido verso el XVII secolo. Entremo cossita nel periodo Venessian, 'ndóe la vita a Boolón l'è andà avanti tranquila a parte i briganti, le guere coi soldà de la Lega de Cambrai tra el 1509 e 'l 1516 e la peste del 1630 che l'à copà 800 abitanti su 2500 con sepoltura ne la fossa arènte a la cèsa de San Pierin e Lasareto in località Lovara.
Una de le poche note positive l'è stà el svilupo de la coltivassión dei morari par la laorassion de la seda, sensa desméntegàrse de la risicoltura. Sóto Napoleón nel 1796, jè scomincià le rogne, butando el paese sóto sóra con violensa e roinando l'economia, ma ànca sóto i austriaçi nel 1814 le cose no jè andà al mejo. Nel 1866 Boolón l'è deventà italiana. Tra le cése da segnalàr el Monastero de San Zuàne Batista vólù dai monaci benedetini tra la fin del XII e l'inissio del XIII secolo e consegnà ne le mane nel '500 dei Frati Minori Francescani; al dì de ancò gh'è restà l'Oratorio otagonal e le basi de la basilica dopo la trasformassion del monastero in casa colonica. L'antica cèsa de San Biagio, Fermo e Rustico del XII secolo, l'éra un tempo la capela privata del Vescovo de Verona; ristruturà nel 1742 la se presenta con un bèl campanìl del '400 e la conserva 'na Pietà del quatrosento e dipinti del sinqueçènto de Nicolò Giolfino, Paolo Farinati e Felice Brusasorzi, del '700 de Gioàni e Nicola Marcola, Savério Da la Rosa, Gioàni Batista Burato e Agostino Ugolini, un afresco sul sofito de Marco Marcola mentre del 1760 l'è l'altàr magior in marmo dedicà al patron S.Biagio l'è del Maderna.
La Parochiàl de San Bèpo del XIX secolo l'è stà scomincià nel 1844 e consacrà nel 1945. El Santuario de la "Madona de la Cintura" (ver.sengia) l'è stà vólù da l'arciprete don Antonio Barbieri e dai abitanti de la contrada Madona nel 1648 e devastà dai francesi nel 1796. Tra le vile e palassi da segnalàr el Palasso Vescovil che lo catémo scrito su 'na relassion de un notaio de la curia nel 1279 come "casa merlata"; al dì de ancò ospita la sede del municipio, la biblioteca comunàl e 'l percorso tra i stili del mobile d'arte che da 'ste parti i le produse bèn. A Vilafontana se pól 'édar la Vila Noris, 'ndóe gà dormio nel lujo 1796 Napoleón. Par ci ghe piase le curiosità, secondo tradissión l'antico nome de Boolón "Bodolonem" vól dir "Tera de le Rane" mentre i studiosi i le fa derivàr da "Bodos" che ne l'antico idioma greco-romano vól dir "piano de la crea" pianura con tera argilosa; come proa de 'sta version esiste ancora la contrà Creari 'ndóe un tempo gh'éra de le fornase par quarèi e anfore. Dopo avér leto tuta la storia de Boolón Ve convien sponsar un poco o far quatro passi nel magnifico parco "Val del Menago".
La Pieve de San Zuàne
San Zuàne in campagna "ecclesia baptismalis" l'è 'na pieve che se cata a quatro chilometri dal çéntro de Boolón su la strada che la ména a Concamarise. El complésso l'è costituido da 'na césa proto-romanica con una sola navàda e da una sola abside (che un tempo i-éra do 
posissionà parte par parte), un campanìl, un'abitassión del seteçénto e da un batistero a oto lati 'ndóe l'è stà catà una vasca batesimàl par imbombegàr el bòcia, propio in mèso. Tra i primi documenti catémo la "deçima" che la pieve g'avéa da pagàr a la Curia de Verona ne la pagina “Pagina firmitatis” méssa nero su bianco dal Vescovo Ratoldo el 24 dugno del 813.
Co' tuta probabilità el batistero el funsionava, vista la posissión, anca par i paesi tachè come Concamarise, Salizòl e Bionde. La pieve de San Zuàne la s'a sassinà in parte co' el famoso teremoto del 1117 e sistemà a la fine del XIII secolo co' i tòchi recuperadi, anca se, altri problemi gh'è stà secoli prima, co' le devastassioni dei ùngari 860-890 sistemà nel X-XI secolo e col teremoto del 793. Nel 1454 gh'è stà la visita del Vescovo che'l segnalava che la "capèla campestre" l'éra conservà mal e quindi la dovéa èssar sistemà e serà a ciave. Nel 1525 el paroco Don Lucido da Burgo el g'avù l'autorisassión da Papa Clemente VII a darghe in gestión a vita, 
pieve e batistero a fra Zuàne da Legnago ma co l'impegno de restauràr el tuto, defàti l'è stà fato su da nóvo el quèrto, rifàto l'arco piassè importante de la navàda e l'abside de sànca, ricostruìdo el campanìl e realisà una nóva entràda par el batistero piturà a fresco e quertà.
Nel 1792 propio el batistero l'è stà sgrandà e trasformà in oratorio co'un presbiterio, coro e sagrestia invésse la césa utilisà come stàla, pòrtego e fenìl no sassinando par fortuna, la pitura ne l'abside de sànca del XIV secolo; gh'è Cristo sentà sul trono del giudissio e a la so destra la Madona col Butìn che ciucia el late, mentre le figure a sanca catémo Sant'Agata, co' in man la palma del martirio, e co' Santa Caterina d'Alessandria. Dal lato artistico el batistèro a pianta otagonàl l'è stà 'frescà dai frati minori nel 1525, co' bèle pitùre sènografiche dai colori particolari; ne la parte de sòto gh'è sète piture tra òto colone de ordine corinzio co' sète storie de vita de San Zuàne Batista, se véde Zacaria nel tempio, Zuàne, el batesimo de Gesù, Cristo e Piéro, la decolassión de Zuàne Batista, la molona s-ciapà a 
disnàr da Erode, la molona portà da Erodiade. Sóto la cupola catémo sul sfondo, la Gloria del Pare tra i angeli da 'ndóe parte oto festoni de fóie che i finisse sui pilastri.
Tra i festoni se vèrze òto lunete del '500 con rapresentà le storie del la Passión del Signór, l’ultima çéna, l’orassión nel’orto, Gesù ciapà da le Guardie, Gesù denànsi a Pilato, la flagelassión, el viàio al Calvario, la Crocefissión co' ai piedi Maria e Zuàne, la Resuressión de Gesù. Nel sofìto del presbiretio catémo piture a frésco de la scóla veneta del '700, 'na pèrgola co' quatro angeli, invésse nei penàci gh'è rapresentà i simboli dei quatro 'vangelisti. Nel’abside l'è rafigurà, in costumi del '700, la Natività de San Zuàne e invéçe sui fiànchi de l’altàr catémo du riquadri, Mosè con le tàole de la Lése, e forsi, el profeta Elia.'Péna drénto al batistèro catémo un aquasantiéra murà forsi de epoca gotica. Durante un scavo archeologico de la Soprintendensa l'è stà catà soto al Batistero 129 denàri “Enriciani” e conià dala Zecca de Verona nel X-XI secolo.