ROARÉDO (Roveredo di Guà)
Popolassión: 1.573 Altessa: 16 metri sóra el livèl del mar Superfice: 10,16 chilometri quadri Comùni confinanti: Pressana, Cologna Veneta, Poiana Major VI, Montagnana PD
El teritorio del comune de Roarédo de Guà el se cata ne la parte più orientàl de la provincia veronese a circa 50 chilometri da Verona. Un tempo 'sta zona l'éra quertà da boschi de "querce farnie" che a l'epoca le vegnéa ciamade "robur" (róvere, róaro) e de conseguensa un bosco "roberetum" l'à dato el nome al paese oltre al fiume Guà che passa da 'ste parti. 'Sto corso d'aqua l'è conossù ànca come "Fluminis Novi" Fiume Novo, mentre da la fonte fin a Montecio Magior se ciama Agno (Corso d'aqua= latin amnis), poi Guà (forse dal latin aguatus = aquatus = impaludà) o Fiume Novo da Lonigo fino a Roverédo de Guà e par finìr Frassine nel Montagnanese. Da precisàr che da Zimèla a Roveredo el vien ciamà ànca Canàl. Anticamente el se butava ne l'Àdese a Sabión prima de la famosa "rotta della Cucca" (Veronèla) del 589 d.C. che l'à modificà el corso del nostro "Athesis". In 'stà zona el Fiumenóvo l'andava avanti pian pianin 'isto la scarsa pendensa e dando origine a 'na zona paludosa ciamada "ager acquatus" toponimo che col tempo dopo numaròse mutasioni el s'à trasformà in Guà. La palude ànca dopo i laori par incanàlar l'Àdese da parte dei monaci benedetini no la riussiva a sugarse parchè continuamente alimentada da l'Agno ciamà col tempo "Flumen Mortum" e dopo altre bonifiche Fiumenóvo.
In epoca Romana el teritorio de Roveredo el faséa parte de l'Agro Atestino sóto la Tribù Romilia e regalà da Cesare Otaviàn Augusto dopo avér vinto contro Cesare e Cleopatra a Azio nel setembre del 31 a.C. ai fedeli soldà veterani, reduci da le batàje (vedi Pressana) come scrito su 'na lapide catada sul confìn comunàl. De 'sto periodo jè stà catade un bèl mucio de monéde e armadure. Par catàr inveçe qualche testimoniansa abitativa dopo la famosa "rotta" bisògna risalir fin al 1100, quando Roveredo come "vila" el faséa parte del feudo de Cologna Veneta sóto i signori Maltravérsi. Tra i "paróni" oltre al Vescovo de Vicensa gh'è da segnalàr Eselìn da Romàn, col tempo i Scaligeri che i l'à inglobà nel Capitanado de Cologna e finido questo periodo, Roveredo l'è deventà feudo dei Malaspina, passando ai Conti de Thiene prima de l'arivo de la Republica Venessiana. E pròpio sóto Venessia che Roveredo deventa un importante çentro comerciàl al confìn con le province de Vicensa e Padova, lóngo el Guà, a l'epoca navigabile.
Così, nel XVI secolo se vede un çerto svilupo economico con l'alevamento dei cavaleri e de l'industria de la canapa ma 'isto che'l fondo del fiume col passàr dei ani el s'à alsà, le vie fluviali-comerciali jè stà 'bandonàde par far posto solo a l'agricoltura con cereali, tabaco e fruta. Tra le cése, gh'è quèla parochiàl dedicada a San Piéro ricostruida a metà del XVIII secolo che la presenta, drénto, 'na tela del siesento che la rafigura la Madona col Butìn tra i Santi Piéro e Paolo e 'na statua lignea del XIV secolo de la Madona. Da segnalàr 'ànca la césa del '400 de la Madona de la Salute ne l'omònima contrà. Conossuda l'è Vila Camerini sóranominada "La Possesion", del '700, ricostruida su 'na vècia costrussión del XV secolo, residensa dei conti Ferro; par finìr, in paese, gh'è el Palasso Selvatico-Mottola del XV secolo.
