Somacampagna

SOMACAMPAGNA (Sommacampagna)

Popolassión: 14.821 Altessa: 121 metri sóra el livèl del mar Superfice: 40,83 chilometri quadri Comùni confinanti: Sona, Valéso sul Ménso, Vilafranca de Verona, Verona.

Comùn posissionà a 15 chilometri in diressión ovest da Verona al confìn orientàl de l'anfiteatro morenico del Garda e la fin de la campagna veronese. L'òmo l'è presente in 'sto teritorio fin da la preistoria come pól testimoniàr tombe e vasi de l'Età del Brónso vegnudi a la luçe. Ma le prime notissie e testimonianse storiche jè de epoca romana: in quél periodo gh'éra un vilàio che nel corso dei secoli de dominassión romana el s'à svilupà mentre nel 38 a.C. l'éra stà costruì un tempio dedicà a la Dea Diana. A testimoniansa de la costrussión, durante i laori de restauro de la cèsa de Sant'Andrea l'è stà scoèrta un ara votiva con sóra scriti i nomi de i consoli Lentulo e Norbano. Un altra ara votiva de un tempio dedicà a Minerva l'è stà catà 'ndóe un tempo gh'éra la cèsa de San Piéro; nel teritorio comunàl jè stà scoèrte ànca magnifiche pavimentassióni, monéde e la necropoli de Custosa (l'antica Custodia). Con tuta probabilità Somacampagna l'éra a l'epoca 'na fortessa, un "vicus" fortificado, che tegnéa d'ocio la campagna tra el Menso e l'Àdese, un lógo 'ndóe passava soldà de vari eserçiti come quél de Atila fermà nel 452 arènte a Somacampagna ma ànca teatro de guere come nel 312 tra Costantino e Ruricio.

Dopo i franchi e i longobardi, nel 930 el paese lo catémo scrito su de i documenti che i parla de 'na donassión al Monastero de San Zén, col nome de Summacampania (o Summa Campanea). Un documento del 1035 parla de la pieve de Sant'Andrea 'ndóe un tempo gh'éra intorno le prime case, quéle col querto de paja. Nel 1178 el podestà de Verona Grumerio l'avéa disegnà i confini de la Campagna Veronese che dal pónto de vista aministrativo dipendea da Verona e che oviamente comprendea ànca Somacampagna. Nel 1185 catémo el primo documento scrito che parla de Custosa, 'ndóe ne vien dito ànca che i consoli Veronesi ne la costrussión del borgo fortificato de Vilafranca i avéa proposto de far fossati de protession. Nel 1220 secondo 'na legenda de Tomaso da Celano, Francesco d'Assisi dopo avér visità Verona, l'è passà da 'ste parti fermandose par poco in una costrussión arènte a l'oratorio de Santa Maria in Monte e tra le altre i dise che l'àbia fondà pròpio chi, la comunità dei frati Minori Conventuali sopressa nel 1810 da Napoleón.

Dopo le guere tra i guelfi e i ghibelini nel XIII secolo, nel 1241 Somacampagna l'è stà ciapà de mira dai mantoani e cossita s'à pensà de rinforsàr la fossa de protessión progetà 35 ani prima dal castèl de Vilafranca fin a chi. Durante el periodo scaligero i éra stà costruidi un par de castèi, uno a Somacampagna e l'altro a Custosa deventadi importantissimi nel 1375 par i Visconti durante la guera contro i Scaligeri. Da ricordàr un famoso personajo nato tra el 1320 e 'l 1330, un çerto "Gidino da Somacampagna" fiól de Manfredo e neodo de un Azzolino da Somacampagna, che da butel l'éra stà consijà a studiàr latin e francese; a la corte de Cangrande II De la Scala l'éra deventà un amigo-consijer e ministro de le finanse. Ma 'sto personajo l'è deventà famoso par el "Trattato sui Ritmi Volgari" catà tri secoli dopo a Bologna da Scipione Maffei durante un viaio e regalà a la Biblioteca Capitolàr de Verona. Ritornando a la storia, dopo i Visconti e i Carraresi l'è stà el turno del dominio Venessian; Somacampagnà l'éra stà messa nel Vicariato de Bussolengo mentre Custosa l'éra a le dipendense de Verona fin a la fin del '700.

Nel 1436 l'ocupassion de Francesco Gonzaga dei teritori de Somacampagna e Custosa mentre nel 1438 l'è rivà la peste. Nel 1500 s'à svilupà la coltivassión dei morari e 'l comercio de lana e seda, ma le rogne no i-éra finide, a causa del passàio dei soldà de la Lega de Cambrai che i avéa messo sóto sóra el teritorio. Nel 1535 la parochia de Custosa s'à destacà da S.Andrea de Somacampagna e la popolassión che vivéa intorno a la césa de Sant'Andrea s'à spostà verso el çentro atuàl del paese. Nel censimento del 1585 a Somacampagna risultava 2371 campi (474 destinà a pascolo) divisi tra tuti i abitanti del paese in quota magior ai òmeni rispeto a le dòne. Nel 1630 altro giro de peste con 464 morti su 1450 persone. Nel 1617 l'è nata la frassión Casele par merito del benefator Angelo Brighenti che l'avéa fato costruìr 'na ceséta, deventà col tempo, dopo èssar stà sgrandà, un oratorio de 'na çerta importansa.

Nel '700 a Somacampagna jè rivà dei Nobili da Verona che i s'à zontà a quéi zà presenti, costruendo magnifiche vile che podémo 'édar ànca al dì de ancò. Verso l'inissio de l'800 l'è stà el turno de Napoleón e dei Austriaçi; nel 1814 sóto l'Austria l'aministrassion del paese l'éra ne le mane de n'assemblea composta da 30 paróni e pròpio in 'sto periodo i éra stà sistemadi 22 chilometri de strade e costruì un tòco de la ferovia Milan-Venessia. El teritorio, in particolàr, la frassión Custosa l'è stà interessà nel Risorgimento da le batàje de le guere de indipendensa del 1848, del 1859 e del 1866. A ricordo de le guere de Indipendensa e a quanti jè stà vitime ne le guére l'è restà un Ossario (1879), l'obelisco de la Cavalchina, el monumento ai caduti de Monte Cróse e la famosa casa del Tamburin Sardo. Tra le cése da segnalàr la pieve de San'Andrea ne la forma atuàl del X-XI secolo con modifiche del XII e XIV secolo; a tri absidi, tri navade e tri entrade, conserva 'na bèla Via Crucis in legno e afreschi che i va dal XI al XIII secolo oltre a un bèl Giudissio Universal del Cicogna del XIV secolo. Altra césa antica l'è el Santuario de la Madona del Monte fórsi del '400, rifata nel XVIII secolo, conserva un bèl quadro de la 'Sùnta con San Francesco, Sant'Antonio e San Bonaventura segno de la presensa dei Frati Minori; un bèl afresco con la Madona col Butìn el se cata sóra a l'altàr in marmo in stil baroco del 1712. Del 1816 l'è inveçe la Madona de la Salute vólù da la faméja Venier, mentre del XVIII secolo ma de origini piassé antiche l'è la césa parochiàl de San Piéro in Vinculis de Custosa 'ndóe podémo 'dar 'na statua del '400 con rafigurà la Madona. A Casele la parochiàl del Redentor costruida nel 1904 ma originaria del 1617. E par finìr la cèsa parochiàl de Somacampagna de l'Imacolata e Sant'Andrea Apostolo dita del Pirlar, deventà importante nel 1535 quando la zénte la s'à trasferì da la pieve de Sant'Andrea in quéla piassé çentràl del Pirlàr che da la metà del XVIII secolo l'è stà ricostruida bèla granda su disegni del Cristofoli e consacrà nel 1762 dal Vescovo de Verona, Nicolò Giustiniani mentre el campanìl l'è de l'antica cèsa de la Madona del Pirlar.

Tra le vile da segnalàr Cà Zenobia sgrandà nel XVI secolo, con tochi de muri de epoca romanica (XII-XIII sec.); Vila Fioco del XVI secolo su disegno del Sanmicheli con bèl giardìn a l'italiana, un tempo sede del comando piemontese nel 1848 con arènte la ceséta de San Michelin che conserva 'na pala de Dòminico Brusasorzi e un importante reliquario; Vila Venier "La Bassa" del XVII secolo con giardìn a l'italiana e parco verto al publico; Vila Bocca-Trezza "Mile e una Rosa" in çentro al paese 'ndóe i g'a sponsà Ferdinando de Savoia duca de Genova e l'Arciduca Alberto d'Austria durante le guere del 1848 e del 1866; Vila Ravignani 'ndóe ne la prima guera de indipendensa el s'à fermà Vitorio Emanuele; Vila Campostrini "la decima" casa colonica 'ndóe un tempo se pagava le decime e la magnifica Vila Ottolini-Pignatti a Custosa del 1600.

La Pieve de Sant'Andrea

La pieve l'è nata sora un lógo de culto romàn, a testimoniansa podémo catàr de le piére bianche de fiànco a la porta de la cèsa e altre do mésse una sóra l'altra nel pilón ne la prima arcada a destra de la navàda centràl. Ma quéla piassè interessante la catémo in una colona tacà a l'abside, dedicà a la dea Leituria, saltà fóra co' i laóri dei ani '40 del novecénto; in particolàr se lése anca i nomi de Caio Norbano Flacco e Lucio Cornelio Lentulo consoli de l'an 38 a.C.. Secondo i studiosi Leituria no se catà da nissuna altra parte e forsi l'éra una divinità "retica" ligà a la natura come Diana. L'ara romana no l'è stà sistemà a caso, defàti la divide la parte 'ndóe gh'éra i céreghi da quéla de ci 'scoltàva e l'è destésa su de un lato in modo da no lésar bén quél che gh'è scrito, quasi a demostràr quanto l'éra forte la Cristianità su le divinità pagane.

La césa podarìa èssar passà da pagàn a cristiàn nel VIII secolo quando gh'è stà i Longobardi come ne dise i tòchi de piéra del tempo. La pieve l'éra un pònto de riferimento par la comunità, se batesàva i butini, se faséa i funerài, se celebràva riti importanti e se tiràva su le "dèçime". Bisón pensàr anca, che l'è stà costruìda in un pónto alto, co' la possibilità de coltivàr el terén respèto la pianura ciamà "campagna seca" e posissionà a l'incròso de strade, quindi con funsión de contról.

A partìr dal Dosènto, par colpa de le guère, de la costrussion de nóe strade e nóe cèse de qua e de là, sensa contàr che la zénte voléa slargàr le cèse presenti parché la popolassión l'éra deventà piassè, s'a volù spostàr le funsioni ne la nóa Parochiàl de Santa Maria. El primo documento che ne dise calcossa de la pieve de Sant'Andrea l'è del 1035. Ma par capìr mèio come l'è fata, fémo un salto drénto; la pianta l'è divisa in tre navàde, quéla centràl co' l'abside e do da le parte, orientàde a est, invéçe el quèrto l'è fato a capàna; el sofìto no l'è originàl ma fato su da nóvo nel XV secolo, defàti prima l'éra piàn.Tra le cose particolari segnalémo che drénto gh'è 'bastansa stròo e far 'na foto devénta complicà se no te impissi la luçe o te tién el portón vèrto, ma soratuto la costrussión l'è ciossa, bèla massissa, come ne dimostra le gròsse colòne e i pilastri co'i quarèi che tièn su le campàde co' arco a tuto sèsto tra la navàda çentràl e le altre più picenine; quéste ne la parte piassè alta le g'a de le finestrèle giusto par védarghe calcossa. Le absidi che gh'è da le parte iè stè ricostruide nei ani '40 del '900 da Ferdinando Forlati sistemando quél fato nel 1853.

Le pitùre in tanti casi iè trocàde quésto parché gh'è stà mésso man a la cèsa massa 'òlte come se véde ne l'abside çentràl spostà piassè 'vànti dopo avér fato el campanìl. El pavìmento sóto la prima fila de banchi el g'a dei tòchi de piéra che tàia la césa da l'altro vèrso; quésti faséa parte de un muréto che servéa a divìdar el popolo dal clèro, restà in pié fin al '700 quando dopo avérlo butà zò, dòne e buteléti i g'à portà in processión le pieréte come reliquie.

A parte le pitùre del periodo romanico che i-è colegàde tra de lóre come significàdo, le altre iè dei riquadri votivi fati realisàr da ci g'avéa schèi par speràr ne la man dei Santi. In póche parole, quéi de età romanica iè méssi mal o a tochetìni, quéi del do-tresènto iè magnifici come el Giudissio Universàl e quéi del Mastro de SomaCampagna; par finìr el Sant'Andrea o forsi San Piéro del '500. Una variètà incredibile de piture a frésco o a séco: Ne la paréde a sud podémo catàr la rafigurassión de un corteo de Santi, co' San Paolo, San Piéro co' un devòto, Santa Maria Madaléna portà in çiél dai Angeli e la Vergine co' el Butìn; Ne la seconda colona a destra gh'è de le sène sassinade a parte quéle mésse un poco mèio come el Batéso de Cristo e la Madona co' el Butìn; Ne la navàda nord catémo un San Giacomo Magiór; Su la paréde sud catémo San Giorgio e la Principessa del '300; ne l'abside gh'è la Madona de l'Umiltà co' Sant'Antonio Abate e un Santo vescovo de fine '300; ne la navàda centràl, su la paréde tacà a la navàda sud gh'è un San Vitór sempre de fine '300; Tra le piture murali del '300 catémo tre requadri con Madona co' Butìn che ciucia, San Bòrtolo e Sant'Antonio abate; prima de 'nar fóra, de sóra a la porta prinçipàl, el grande Giudissio Universàl. Su quésto bisón fermarse un àtimo a vardàrlo, parché l'è incredibile. L'è piturà su tre fasse, una sóra l'altra: in basso catémo Abramo co' le àneme de giusti simbolo de Paradiso e forsi l'inferno; in mèso gh'è el "trono del Signór" del "Giorno del Giudissio", i simboli de la "Passión" co' 'na Colomba, i Arcangeli che i g'a desmenà un ròdolo de carta co' sóra i passi del Vangelo secondo Matéo e par finìr, i morti che i se desmissia e i vién fóra da le tombe; de sóra, Cristo "giudice" sentà sóra i cherubini co' de fianco la Madona e San Gioàni Batista co' Angeli che sona la tromba.

Par finìr fémo un salto de fóra. Le fassade le g'a de le mura co' piére moreniche co' un missioto de quaréi e altre pieréte utilisà un tempo par altre robe; i cantóni e i stìpiti iè fati co' piére squadrè e quarèi; podémo catàr tochi de maltà piturà che ne pensàr che la Pieve no la fusse come la se presenta 'dèsso; su la fassàda prinçipàl gh'è una fenestrèla a cróse spostà a sànca de ci varda, che podarìa èssar la posissión de la testa de Cristo su la cróse. Lóngo i muri 'na òlta gh'éra tre entràde e de le fenestrèle svasade una de queste l'è stà stupà quando l'è stà costruido el campanìl, butà zò nel 1853 parché mésso 'bastansa mal. Anca nel periodo Venessiàn gh'è stà fato dei laóri, come scrito sul portàl co' data 1491 che te portàva a la "Capèla dei Preti", l'entràda al camposanto. Da segnalàr che un tempo g'avéa anca un Batistéro par i batési. Par fortuna che co' el teremoto nel 1117 no l'è vegnù zò gnénte de particolàr e quindi la Pieve se presenta quasi istéssa a l'originàl. Par farghe visita basta 'nar in diressión del Camposanto del paese, 'ndóe in mèso, gh'è posissionà la césa con do entràde, una nord e l'altra a ovest. Una véra maravéia de la provinçia veronese.