El magnàr in tòla e Radècio, gh’émo ‘l piasér de presentàr càlche réçèta al gran “Radécio rósso de Verona”, che se’l cóltìva a Caselón. Le récète, che répórtémo qua, i-è tòlte da libro “L’oro della Bassa” (veronese) – Ricettario a cura dell’Associazione Pro Loco ‘Casaleone-Carpanea’, publicà ‘n ócasión del ‘IV Concorso Gastronòmico Radécio d’Arzènto’, del 3 de deçémbre 2008.
FAGÓTÌNI DE MÀNZO SU LETO DE RADÉCIO
'Sa ghe vol:
- 150 gr. de puìna frésca
- 250 gr. de Radécio de Verona
- 4 fétìne de filéto de mànzo
- 1 limón
- mèso bicér de òio de óliva ‘stravérgine
- mèso cuciàr de sènapa
- sàl
- péar
Come far:
Se bàte, un poco le fétìne de mànzo. Se le sàla e se le péara. Se spàlma la puìna, dopo ‘vérla bén laóràda. Se sèra ‘l fagótìn. Se prepara la salsa co’l limón, co’ l'òio e la sènapa. Se parécia i córesìni de radécio, bèn lavà, ‘n mèso al piàto e se ghé méte de sóra i fagótìni e se cóndìsse tùto con saór.
BRANZÌN AL SCARTÒSSO CO' RADÉCIO RÓSSO
'Sa ghe vol:
- 4 branzìni (da pórzión),
- 50 gràmi de botiér,
- 8 ólìve nere de Gaeta sénsa òsso,
- 2 teste de Radécio rósso de Verona,
- 2 pomodòri bén maùri,
- Parsémolo,
- àio,
- sàl,
- péar.
Come far:
Nétàr, lavàr e taiàr ‘l Radécio a tóchétìni. Taiàr le ólìve a metà e ‘l pomodòro a cubéti. Smigassàr el parsémolo e l’àio. Paréciàr 4 fòi de carta stagnòla e métàrghe sóra i brànzìni, lavàdi, bèn nètàdi e sènsa rèsche. Métar ‘n tè la pànsa dei branzìni ‘l parsémolo, le ólìve, ‘l radécio, ‘l tritàdo de àio e de parsémolo, ‘l botiér, ‘l sàl e ‘l péar. Séràr a scartòsso e métar ‘n té’l forno a 180 gràdi par 20 mènùdi.
RADÉCIO RÓSSO DE VERONA FRÌTO
'Sa ghe vol:
- 150 gràmi de farina
- 200 gràmi de bìra ciàra
- 400 gràmi de Radécio rósso de Verona
- 1 óvo
- Òio ‘staverzìne de ólìva vènéto par frìsar
- Sàl (quanto ghe ne bàsta).
Come far:
In una pignatina, tamisàr la farina, e méscolàndo co’ càlcòsa, ùdàr tùta la bìra fìn che vièn fóra ‘n compòsto lìssio e tanto flùido. Zóntàrghe la bàla de óvo e méscolàr, par siòliar ‘véntuai grùmi. Lassàr réposàr tùto par ‘n par de óre. ‘Ntànto, lavàr ‘l radécio e torghe via la radìsa, sùgàrlo e taiàrlo ‘n quatro pàrte. Bàtar a neve la ciàra e ‘malgamàrla àla pastèla. Métar drénto ‘n stó composto i tòchéti de radécio e métarli ‘n padèla co’ òio bén caldo. Frìsarli par póchi ménùdi, e po’, métarli su de ‘n fóio de carta sugarìna, par tórghe l’òio che gh’è ‘n più. Spólvaràr de sal e servìr “caldissimo”.
