El magnàr in tòla e le Erbe. Staòlta parlémo del magnàr pitòco, le erbe, le gramegne, le radicèle e tuto quél che te cati lóngo le sése. Con póco te pól cusinàr un bèl piato pronto da magnàr in póchi minuti. Par ci vive in çità l'è dura la questión, ma se te vién vóia de far un giro su le Toresèle o tra Aesa e Quinsàn te pol catàr i vari ingredienti naturali. Con un gósso de oio e un pìssego de sàl l'è pronto in tòla!
1. BRUSCANDOLI
'Sa ghe vol:
- 500g de bruscandoli,
- 50g de oio 'stravergine de oliva,
- sal q.b.
Come far:
Cusina pitòca dal bón saór. I Bruscandoli (le çime del lùpolo salvègo) i crésse longo le sése e par binarle bisón cavàr ìa le pónte quando iè zòene e tendarine. Dopo avérle lavade se le fa bóiar par una diesina de minuti e servidi consà con oio, sal e magari con calche gossa de asédo. Bóni anca nel risoto.
2. SGRÌSOLI
'Sa ghe vol:
- 300g de sgrìsoli (Silene vulgaris),
- 40 g de oio de oliva,
- sal q.b.
Come far:
I Sgrisoli i va binàdi su in primavera, 'pena vién fóra le prime fóje, se cava ìa la parte de sóra. Lavarli bén con l'aqua e fasendoli bóiar par un póco de minuti. I vién méssi in tòla con un fil de òio, un pìssego de sàl.
3. RAMPÒNSOLI
Iè difiçili da catàr. I Rampònsoli (Raperonzoli) l'è un erba dei campi con la raìsa che soméja a quéla de la rava, ma picenina. I va netà bén e consà con un fil de oio e un pìssego de sàl.
4. RADÉCI DA CAMPO
Cosa ghe vol:
- 1 chil de radécio da campo,
- 50g de oio 'stravergine de oliva,
- 100g de panséta,
- 3 spighe de ajo,
- sal
- péar q.b.
Come far:
'Sta verdura la va binada in campagna in primavera. Dopo aver lavà el radécio (raise, foje ecc..) se buta in aqua de boio salà, se scola e se frise nel'oio con un par de spighe de ajo e la panséta tajada a quadreti.
5. MOLESINI
'Sa ghe vol:
- 300g de molesini,
- oio,
- sal q.b.
Come far:
La Valerianela cresse in primavera nei campi. Le fóje rotondé le va netà con aqua corente e servì fresche con un fil oio e un pìssego de sàl.
