El più grande pitór del '900 veronese, l'artista che l'à portà Verona par el mondo e l'à decantà la so çità col penèl. No podémo far finta de gnénte, dovì conòssar la so vita e quanto l'à fato par Verona. Uno dei grandi òmeni che dovémo ringrassiàr, par el patrimonio che n'à lassà.
1858 Angelo Dall'Oca Bianca l'è nato el 31 marso a Verona in vicolo Cavalletto al numero çivico 1084 da Beatrice Resi e Giuseppe Dall'Oca. El pare, vernisadór, l'avéa investìo i propi risparmi in un'ostaria. El falimento de 'sta atività l'à portado la faméja in miseria. Nele Note biografiche scrite nel 1897 el pitór l'à parlà dela só infansia trascorsa nei cantóni e nele strade de Verona, lontàn da la scóla e dai libri. 1873 Dopo la morte del pare, l'avéa scomincià a laoràr come manovàl, imbianchin, muradór e a studiàr. A 15 ani el g'a fato el ritrato "Me pare (Mio Padre)", par convìnsar la mare dela consistensa del só talento pitorico. Con l'aiuto del scultór Ugo Zannoni, el diretór Napoleon Nani e Angelo Pegrassi, entra al'Academia Cignaroli - Scola Brenzoni de Pitura e 
Scultura de Verona fin a la primavera del 1876, anche se 'l Registro de le Matricole d'Iscrissión de l'Academia veronese riporta el só nome solo nel'an 1873/74. 1876 In una biografia, scrita par el catalogo de la Bienàl venessiana del 1912, Dall'Oca el se ricordàva el sò ingresso nel 1876 all'Accademia de Bele Arti de Venezia, no disendo de l'iscrissión e la frequensa al'Academia veronese. El risentìa dela "pitura vernacolàr" de Giacomo Favretto che l'avéa influensà el sò indirisso artistico. Ne le Note biografiche del 1897: "devo al'arte sinceramente viva del povero Favretto - amirada visitando el sò studio - la bona luçe che si è fata nel me indirisso artistico". Le prime esposissioni iè stade insieme ad altri artisti veronesi come Milesi, Novello, Cristani, Navarra, De Stefani. Par la prima olta una sò partecipassión al'Esposissión de la Società de Bele Arti de Verona fin al 1892 con regolarità (anuali fino al 1886 e bienali sucessivamente). 1880 Secondo l'articolo de Ricardo Avanzi, publicado su "L'Arena" del 2 diçembre, Angelo l'è soto le armi. Nel stesso articolo el critico difende el pitór dale acuse de èssar un imitadór de Giacomo Favretto. Nel stesso ano l'avéa parteçipà a tri esposissioni quéla dela Società de Bele Arti, quéla de Brera a Milàn e de Torìn. Chi conosse el pitór Francesco Paolo Michetti.
1881 Nel mese di april la stampa parla del só trionfo al'Esposissión Nassionàl de Milàn, 'ndóe l'era riussido a vèndar, ancora prima del'inaugurassión, tri quadri. Questo apuntamento, l'esposissioni del'an precedente e quéle sucessive, i l'avéa messo in contato con le diverse corenti artistiche italiane e europee come l'impressionismo, el divisionismo e el simbolismo. 1882 A Roma, conosse òmeni de cultura come Carducci, D'Annunzio, Pascarella, adiritura presentado a la Regina Margherita che ghe farà pituràr molti quadri. Sempre al periodo romàn i primi interessi par la fotografia, dovudi, anca al'amicissia con Francesco Paolo Michetti. El primo dipinto, comunque, per el qual l'è documentabile l'uso dela fotografia l'è "Il lavatoio", esposto nel 1881 a Brera. Dopo Roma 'n'altro sogiorno a Firense 'ndoe a causa dela piena del'Adese el ghe stà poco, avegnuda la note del 15 setembre. L'esposissión dela Società de Bele Arti de Verona, programà par noémbre-dicembre, no l'è stà fata. Molti artisti veronesi, tra cui Dall'Oca, con i pié nel fango, i avéa dipinto la Verona che la stava par sparìr. 1883 No avendo podù far védar la só arte ne la propia çità nel 1882, a causa del'inondassión, Dall'Oca, Sorio, Avanzi, Cabianca, Nani, De Stefani i avéa invià le propie opere, al'inissio del 1883, al'Esposissión Internassionàl de Bele Arti, ospitada nel novo Palasso dele Esposissioni de via Nazionale, a Roma. 1884 Al' Esposissión Nassionàl de Torin i sovrani d'Italia i-avéa aquistado do só tele e la regina Margherita g'avéa comissionà altri lavori. Al'Esposissión Internassionàl de Barcelona el ciapa el primo premio con Pelarine e Punto?
1885 Con Mosè Bianchi e Luigi Nono la so esposissión a Anversa. A Viena el fa una personàl. La regina Margherita g'avéa comissionà dò quadri, Ritorno dai campi e Vendemia. 1886 Nominado membro del'Academia de Bele Arti Cignaroli e dela Società de Bele Arti de Verona. In autuno altra partecipassión al'Esposissión de Brera a Milano otegnendo el premio Principe Umberto par el quadro Ave Maria gratia plena, che resta ne la Galleria d'Arte Moderna dela çità. 1887 Esposissión Nassionàl de Venessia. 1888 Esposissioni a Monaco, a Barcelona, a Viena, a Bologna, a Torìn, a Milàn. 1891 Sul finir del'an, do opere al'Esposissión Nassionàl de Bele Arti de Palermo; con lu gh'è anca Avanzi, Nani e Calvi. A Monaco de Baviera ala Mostra Internassionàl esposissión in compagnia de Vincenzo De Stefani e Francesco Danieli. El De Stefani vinçe la Medaia d'oro con el só dipinto. La cosa l'avéa fato scalpor sui giornai de Verona e numerose le polemiche: el Dall'Oca "batudo a Monaco da un só compaesan"; ma l'artista retifica "no l'è vero che sia stà batudo, coréa nele sène de figura mentre el De Stefani l'è stà premiado par el paesagio". Inoltre altra partecipassión a la Triénàl de Brera, a Milano. 1892 L'era tra i soci fondadori del Circolo Artistico che, travolto in breve tempo "dal spirito de fassión e dale beghe", el finirà desfandose. A la mostra inaugurada el 2 majo el pitor no'l ciapa parte, giustificandose con i massa impegni fora Verona. A partir da st'ano el mancarà a tute le esposissioni dela só çità. Parteçipa inveçe al'Esposissión Nassionàl de Bele Arti de Palermo e de Genova. 1893 A Cicago se tien l' Esposission mondial. El Veneto l'éra rapresentado da Nani, Dall'Oca, Ciardi, Fragiacomo, Nono, Milesi, Da Molin, Gasperini, Lancerotto. 1894 Partecipa a majo al' Esposissión internassionàl de Berlìn con La Prima Messa, comprado da la Società Artistica par el Museo çivico de Berlìn. 1895 In april presenta dò quadri al'Esposissión de Berlìn e, altri dò, a quela de Praga. Nel mese de setembre va contro, con lo pseudonimo B. Gugole, al maestro-diretor Napoleone Nani, del'Accademia de Pitura e Scultura Cignaroli. 1896 Continua a lotàr, contro Napoleone Nani, par el rinovamento del'insegnamento al'Academia Cignaroli e a espór al'estero. 1898 Lavora al dipinto "Gli amori delle anime", esposto a Torìn e giudicado la più forte opera del pitòr. El dipinto, premiado nel 1900 a Parigi, sucessivamente a Saint Louis e nel 1908 a Verona, l'avéa costituido una svolta importante ne l'atività pitorica del'artista. 1899 El se unisse in lota ale polemiche nate al'interno del'Academia Cignaroli a Mosè Bianchi che'l giudica Nani conservadór. Su "L'Arena" i éra publicadi dò articoli, firmati G. N., con i quali el pitòr l'era acusà de "truffare il publico avvalendosi dell'uso de fotografie" e de agire con "talentone da industriàl". Espone par la prima volta a Venessia a la IIIa Esposissión Internassionàl. 1900 Partecipa al'Esposissión Universàl de Parigi otegnendo la Medaja d'oro par l'opera "Gli amori delle anime" del 1898. Altre du esposissioni - Trienàl de Milàn e infine al' Esposissión Internassionàl de Berlìn con "Anime assolte".
1901 A Budapest espone 56 opere. 1903 Altro invido de partecipassión al'Esposissión de St. Louis. Prima del'apertura dela V Esposissión Internassionàl d'arte dela çità de Venessia, nasse polemiche: Dall'Oca l'avéa presentà a la giuria 8 opere e espresso el desiderio de èssar "in tute acetade o in tute rifiutade", par poder mostràr" ognuna dele forme in cui la se çimenta l'arte moderna". Par la giuria solo tri i-éra bele e Dall'Oca l'éra deciso a ritirarle tute. Grassie al'intervento finàl del presidente, el pitòr l'éra stà acontentà. 1905 Partecipassión a la VIa Esposissión Internassionàl de Bele Arti de la çità de Venessia. 1907 Presenta du quadri ala VII Esposissión Internassionàl de Bele Arti dela çità de Venessia e du a Barcelona. 1908 Torna a far èdar ne la propia çità dopo disdot'ani in ocasión del 25° dela fondassión dela Società de Bele Arti de Verona con l'opera "Gli Amori delle anime" e "Testa de dona. Par tuto l'ano le cronache le riporta el caso de "Gli Amori delle anime" (1898): la Giunta Comunàl de Verona interessada al'aquisto la ritièn el valòr (25.000 lire) massa costoso par el propio bilancio; el quadro el vièn, crompà da Rodolfo Angheben, asessòr comunàl, e da lu donà al Comùn de Verona. 1910 Partecipa a la IXa 'Esposissión Internassionàl de Bele Arti dela çità de Venessia. 1915 El vièn invità a partecipàr a la Bienàl del 1916. Malgrado risponda positivamente a l'invido, no'l partecipa: el sò nome, infati, no'l risulta nel catalogo de la sucessiva Bienàl del 1920. Da questo momento, pur continuando a laoràr, rifiuta de parteçipàr a altre esposissioni e deventa el difensór, de la "Vecia Verona minaciada dal progresso çivil". Diversi iè i sói scriti e articoli contro le istitussioni moderniste. 1921 Al Teatro Filarmonico, el 18 diçembre, Renato Simoni l'avéa tegnudo un discorso in onòr dei amiçi Dall'Oca e Berto Barbarani. In april el Comùn de Verona organisa, ne la sede museal del Teatro Romàn una mostra de disegni del pitòr. Intorno a questi ani el sogiorna de spesso sul Lago, a Garda e a Tori del Benaco 'ndóe l'11 otobre del 1925 l'avéa tegnudo un discorso de ringrassiamento par aver ricevuo la citadinansa onoraria del paese. 1931 Butéi arlévi de Guido Trentini, al'Academia Cignaroli, par protesta i avéa spacà in 52 tochi un nudo giovanil del 1875. El disegno ricatado in un posséto stradàl l'è stà ricostruido da un restauradór e conservado ala Galeria d'Arte Moderna de Verona. 1932 Reclama, indignado, la restitussión del quadro Piassa Erbe, esposto ala Bienàl de Venessia del 1903, rimasto par ani ne la Galeria d'Arte Moderna de la çità lagunar, rimosso da le sale verte al publico e confinado nei magasini de le "croste". El dipinto entra a far parte, in deposito permanente, de la Colessión Civica de la Galeria d'Arte Moderna e Contemporanea de Verona.
1937 Dona el ricavado de la vendita del dipinto Ave Maria (un primo bosseto del quadro Ave Maria gratia plena) a favór de le povere faméje dele Casemate. 1939 El 24 diçembre l'è inaugurado el Vilajo Dal'Oca, costruido grassie ad una donassión del pitòr e in seguito ampliado con il suo lassito testamentario. Ne l'istà iè inaugurade 4 sale "dalochiane" ne la Galleria d'Arte Moderna de Verona e el Comùn publica un fassicolo Opere de A. D. B. a la Galeria d'arte Moderna, con prefassión de M. Biancale. L'è publicada, a cura de Carlo Manzini, dal'editòr Mondadori, la monografia Angelo Dall'Oca Bianca nel'arte e nela vita, con sagi de R. Simoni e G. Marangoni, coredada da 91 taole in bianco e nero e in tricromia, con le opere più significative del'artista. 1941 El 26 majo dispone, par iscrito, del propio patrimonio e nomina erede universàl el Comùn de Verona al qual lassa le opere, el palasso de via S. Maria Roca Magiòr 13, titoli e denaro. Dimanda al Comùn de catàr su le sò più importanti opere in una Galeria, disposta in modo "che la luçe dal'alto la ilumini tute", e de costituir, con queste e quele donade du ani prima, "in perpetuo un complesso, una galeria, a carico del'Erede Universàl". Autorisa la vendita de le altre opere e dispone che, con i rediti del patrimonio, sia garantido un asegno anuo (50.000 lire) a la neoda Teresa, che la riceverà anca l'usufruto de la casa de via S. Maria Roca Magiòr; dispone che le vegna istituide tri borse de studio ogni ano (2.500 lire) per i alievi del'Academia Cignaroli e vegna dato un sussidio a favòr dele vèce poaréte de S. Tomaso, ai butìni 'bandonà del'Istituto E. Caldara, e del Vilajo. 1942 El 18 majo el móre a 84 ani, in via Santa Maria Roca Magiòr 13.