Hellas Verona, una squadra, una çità.
La squadra de balón de la nostra çità, çento ani de storia no i se pól scancelàr, par 'sto motivo l'è uno dei simboli e par molti tifosi una vera e propia fede. Leséndo i primi çento ani de questa gloriosissima squadra se resta incantà par come un tempo un zugadòr el se godéa a pessatàr un balón ciapando quatro schèi. El romanticismo g'a fato posto al "Dio denaro" scancelando quéla magia che g'avéa questo sport. In poche righe quél che te devi savér...
Dopo el grande sucesso in Inghiltera e con le prime partìe nel Nord Italia, fa la só comparsa a Verona el zugo del "fùbal".
1903 Un insegnante de greco del Maffei, un çerto professòr Corrubolo el vién interpelado dai só studenti par decìdar qual nome darghe a la nóa squadra de calcio 'pena fondà: "Podì ciamarla Hellas!" in omajo a la Grecia.
1904 Fratta Pasini, un butèl de faméja nobile, punto de riferimento par i só compagni de studio al Maffei, el partecipa a la creassión del'Hellas contribuendo in bóna parte al fondo sociàl de 32 lire. Ghe vien conferidi visto el grande entusiasmo, la carica de Presidente, el compito de fotografo, el posto in squadra da portiér-capitàn.
1905 Tra i primi colaboradori del Conte Carlo Fratta Pasini el fa comparsa Fantin, fiól de un magistrado. L'ossadura l'è rimasta formada da studenti del Maffei ma con la zónta de altri butèi che quotidianamente jéra impegnadi al laóro.
1906 El Primo gol "ufissiàl" del'Hellas realisado a Vicensa in Campo Marzo (in un torneo con Treviso e Vicensa a fine april) l'è stà opera de un çerto Crespi. La Formassión: Orlandi, Fratta, Villardi, Camuzzoni, Fiorio, Brivio, Crespi (C), Carli, Bascheni, Fantin, Besenzon.
1907 Masprone, grande lanciadór del disco Veronese (partecipante a le olimpiadi de Atene 1896) e atleta de la Bentegodi vien nominado presidente del'Hellas, quando la nostra gloriosa squadra vien inserida ne la "sessión zughi" de la società sportiva Bentegodi. L'Hellas sèita l'atività amatoriàl sensa vardàr i canpionati veri.
1908 El zugo del balón el scominsia a contagiàr tuti i butei e buteleti dei quartieri grassie a una notevole campagna publicitaria de la Bentegodi. Così nasse la seconda squadra "Hellas II" con Cavallaro, Vigevani, Cristani, Bevilacqua, Fracasso, Venturi, Corsini, Valeri, Fietta, Lucchi, Cherubini. Questa squadra partecipa a un torneo par seconde squadre nel vesentìn, ma dopo 3 partìe se ritira con una vitoria e 2 paregi.
1909 Par la "Coppa Città di Verona", messa in palio dal Municipio in ocasión de la fiera de marso, arbitra Recalcati "giudice attento e imparziale". Partecipano, l'Hellas con do squadre, Vicensa e Milan. Quest'ultimo el vinçe el torneo.
1910 Su ordine de la federassión che la vol slargàr el canpionato a varie regioni, l'Hellas vién schierada nel canpionato ufissiàl. El Primo gol ufissiàl in canpionato l'è stà a opera de Bianchi, Venesia-Hellas 2-2, e sucessivamente l'è stà data vinta a la nostra squadra parché el venessiàn Ricobon no l'éra regolarmente tesserado. Nel girón Veneto-Emilian, 1° Vicensa, 2°Hellas, 3° Bologna, 4° Venessia.
1911 La prima vitoria del'Hellas sul Vicensa a opera de Bianchi e "Pippo" Forlivesi (sucessivamente nassionàl). Secondo posto in classifica de drio al Venessia e gnente promossión.
1912/13 Liniger, el primo straniero (svissero) in maja "gialo e blù" vegnù dal Basilea a orchestràr la nostra difesa. L'Hellas vinçe el girón e incontra ne la seconda fase (...'na disfata), le grandi squadre come el Genoa, Pro Verceli, Casale, Milan.
1913/14 L'Hellas primo in classifica, con 4 vitorie e un paregio perde l'imbatibilità col Vicensa par 4 a 0. A causa de un infortunio al portièr Girardi vien messo in porta, vista l'assensa de la riserva, el portiér in "pension"da ormai 2 ani che l'éra sentà tra el publico, Signoroni.
1914/15 L' Hellas nonostante aver catà un "bomber", no vinçe el so girón. Corsi el segna 19 reti in 16 partìe.
1915/16 Una partìa del girón Veneto arbitrada da Gama, in tempo de guera, la vién zugà a Pàdoa con solo 7 nostri zugadori parché i altri 4 i avéa perso el trèn. Arivadi in ritardo, la partìa l'éra zà compromessa, vién persa par 5 a 2.
1916/17 Canpionati fermi a causa de la prima guera mondiàl. Se ritorna a le origini con un torneo tra la Scola Tenica Provinçiàl, el Pindemonte, la Sanmicheli e 'l Maffei.
1917/18 "Caduti in guera" Barbasetti, i fradei Benini, Vugevani, Signoroni, Cavalleri.
1918/19 Finida la guera, lo sport riparte. La Bentegodi visti i inutili tentativi de crompàr totalmente l'Hellas, forma una propia squadra.
1919/20 A causa de la guera l'Hellas resta sensa el campo (requisido). Inveçe de fondarse con la Bentegodi, l'Hellas preferisse el Verona FC (ne la sede del'Istituto Tenico de Corso Cavour). In marso l'inaugurassión de la sede al'albero Academia par concessión de Alberto Masprone soto el nome de Hellas Verona.
1920/21 El derby tra le rivali: Arnaldo Porta nato a San Paolo del Brasil sigla la dopieta nel storico derby con la Bentegodi (H 2 - B 1)
1921/22 Grassie al gol de Egidio Chiecchi l'Hellas Verona vinçe in casa del Milàn.
1922/23 El portiér Rossetti subentrado a Battistoni el deventa, grande protagonista de la Coppa d'Oro a Modena, parando el rigór ne la finàl. A l' Albergo Regina la consegna de la copa del valór de 15.000 Lire a l'Hellas Verona.
1923/24 El zugadór Gambarotta de la Novese protesta con l'arbitro Armano par un rigór dato a l'Hellas Verona secondo lu ingiustamente. Ma mentre el nostro atacante el stava par tiràr dal "discheto", Gambarota infufà come na bestia, ciapa la rincorsa e segna ne la só porta. Espulso!
1924/25 A Verona fa comparsa "Spaca reti" Levratto, in grado con el só forte tiro de sfondàr la rete e segnàr gol uno drio a l'altro (15 gol). Solo quart'ultimo posto par la nostra squadra e 2 rigori decisivi sbajadi da Levratto ai fini del risultado.
1925/26 Quatro portieri par el Verona, ma solo Dal Maso se salva, i altri tri, uno pèso de l'altro.
1926/27 El Verona finisse el canpionato al terz'ultimo posto nel girón, vinçéndo parò con la Juve a 10 minuti da la fine e el portiér Combi el g'a uno sfogo de pianto. La Gazeta de lo sport titola: "Un'altra legenda che se ne va: l'invincibilità dei canpioni d'Italia".
1927 La più pesante sconfita de la sò storia, 11 a 0 dal Genoa.
1927/28 Un altro straniér a Verona par tiràr su la squadra. L'alenadór l'ungherese Bekei ogni zobia a le 20,30 el faséa lessioni teoriche a la squadra. A fine canpionato 60 gol subiti e solo 2 vitorie!
1928 1 Agosto 1928, la nassita de l'AC Verona con Presidente Emilio Tiberghien a seguito de la fusion con la Bentegodi e Scaligera.
1929/30 Canpionati a girón unico e Verona in serie B (6° Posto con 39 punti).
1930/31 El nóvo presidente l'è el capitàn Dall'ora e la nóva maja l'è blu con croçe giala.
1931/32 Par el terso ano consecutivo Patuzzi da Isola de la Scala l'è el capocanoniér del Verona con 40 reti in tri stagioni.
1932/33 Olivieri, el più grande portiér del calcio italiàn (canpione del mondo del '38) el finisse la só aventura col Verona dopo 'vérghe milità dal dugno del 1930. Canpionato de Serie B a do gironi da 13 squadre.
1933/34 Grassie ai gol de Busin dito el "bìgolo" nei sparegi salvessa, el Verona alenado ancora una volta da l'ungherese Janos Bekei resta in serie B. Inaugurà el novo "Stadium comunale" dopo lo sfrato dal campo de Borgo Venessia.
1934/35 200 presense in gialoblù par Luigi Bernardi, un record!
1935/36 La Serie B ritorna a giron unico. Grande Verona che grassie a l'alenadór Capra pól vantàr risultadi importanti....esonerado!
1936/37 Grassie a le parate de Egidio Micheloni el Verona l'è riussìo a evitàr i sparegi par la salvessa.
1937/38 Problemi tenici e economiçi par el Verona che l'è costreto a alenarse a porte serà e Remondini vièn vendù al Milàn par 45.000 Lire. I schèi binadi su no i vién investidi, riciamando inveçe vèci zugadori.
1938/39 A Verona fa comparsa un altro straniér par dar magiór entusiasmo a la piassa, l'uruguaiàn Canebones Oliviero Icardi. (18 partìe e 10 reti)
1939/40 Di Prisco, uno dei più grandi bomber del Verona a fine stajón el vegnarà vendù al Padova ma la só cariera la sarà breve e deventarà un politico.
1940/41 Le 19 reti de Luigi Zanetti de Isola de la Scala no jè servide a evitàr la retrocessión del Verona in Serie C a causa de la pessima difesa.
1941/42 El Verona col terso ataco del canpionato, 68 reti, l'è rivà terso e gnénte promossión.
1942/43 Grassie ai 15 gol de Guido Tavellin e de 50 del resto de la squadra, el Verona vién promosso in serie B dopo aver vinto el sò girón e la finàl col Parma.
1943/44 In lujo la federassión forma tri gironi misti A-B. A setembre la sospensión dei canpionadi a causa de la seconda guera mondiàl. I zugadori del Verona i parteçipa nel fratempo al "Torneo del Presidio" divisi ne le squadre de minadori, de le tradote, dei pontieri e dei alpini. Vien organisada in rena la "Coppa Arena" con 6 zugadori par squadra, e el Capocanoniér Tavellin vinçe un servissio da scritoio che vien baratà dal zugadór con una giuba.
1944/45 Canpionato ancora sospeso par guera - In rena vien organisà un altro torneo.
1945/46 Giovanni Chiampan presidente del Verona. La squadra vién inserida a la ripresa dei canpionadi nel giron misto B-C Alta Italia.
1946/47 Torna la serie B. Verona col nóvo alenadòr ungherese Venicech. Da CàdiDai vién el zugadór Sergio Sega che deventerà el capocanoniér a fine stagión con 15 reti.
1947/48 Verona secondo e gnente serie A.
1948/49 Ris-cio retrocessión par un Verona con un mucio de zugadori espulsi.
1949/50 Disdoto reti a testa par Ugo Pozzano e Guido Tavellin e du cambi de alenadori no i serve al Verona par scurlàr l'ambiente e disputàr un canpionato de alta classifica.
1950/51 El novo alenadór l'è Angelo Piccioli.
1951/52 El presidente Chiampan iscrive al campionato una squadra interamente composta da zugadori nati a Verona. L'alenadòr l'è Zekeky. A stagión in corso vegnarà sostituido da Piccioli, voludo dai componenti de la squadra, finendo al 9° posto con 41 punti.
1952/53 Grassie ai 15 gol del "salvatore della patria" Gino Pivatelli el Verona l'è salvo.
1953/54 Novo presidente, al posto de Chiampan ariva Giorgio Mondadori.
1954/55 Verona salvo par un punto.
1955/56 Ritorna l'alenadór Angelo Piccioli
1956/57 Prima promossión in serie A del Verona. Ne l'ultima partìa al Bentegodi davanti a 10.000 persone conquista el punto promossión.
La formassion Ghizzardi, Donzelli, Begalli, Frasi, Cardaro, Stefanini I, Galassini, Ghiandi, Maccacaro, Bertucco, Bassetti. Alenador Piccioli. Altri zugadori: Basiliani, Stefanini II, Canio e Poli. Presidente Giorgio Mondadori.
1957/58 Bel girón d'andata del Verona nel primo canpionato de serie A, ma gnanca i grandi gol del brasiliàn Del Vecchio (in una partìa 5 gol a la Sampdoria) e l'estro del norvegese Gundersen (ex-hockeysta) nonché quéle de Bagnoli no i evita a causa dei numerosi infortuni la retrocessión.
1958/59 Va via el presidente Mondadori sostituido da Gerardo Girardi e vién venduda mèsa squadra, resta parò el grande Osvaldo Bagnoli.
1959/60 Vendudo al Napoli par 45 milioni di lire a fine stajón, Giorgio Maioli uno dei zugadori più positivi de la squadra in un canpionato disputado dal Verona nel' anonimado de metà classifica. Un altra crisi e altra fusión con una squadra citadina 'pena promossa in serie C, l' Hellas. La nóa denominassión l'è Hellas-Verona A.C.
1960/61 Hellas-Verona A.C se salva par miracolo vinçendo le ultime 4 partìe.
1961/62 Hellas-Verona A.C sfiora la serie A. Sospeti par partìa vendù al Napoli nel sparejo promossión da parti de alcuni zugadori veronesi.
1962/63 Setimo posto con 41 punti e vari cambi de alenadór.
1963/64 Se zuga al nóvo Bentegodi, prima partia con 20 mila spetadori soto neve e fredo con un incasso de 13 milioni de lire. Presidente Bruno Albarelli.
1964/65 Alenadòr Giancarlo Cadè. Curiosità: Verona in crisi dopo 5 sconfite consecutive incontra la Spal e Cadè a metà partìa, manda in porta el tersìn acrobata specialista in "rovesciade" Eros Fassetta a causa de l'infortunio del portiér Liberalato. El para de tuto con mane e pié, a un minuto da la fine el gol par el Verona a opera de Giulio Sega.
1965/66 Bonazzi l'è el nóvo presidente del'Hellas Verona. Omero Tognon el nóvo alenadòr
1966/67 Saverio Garonzi deventa vice-presidente. Tognon vién esonerà verso metà canpionato. Subentra Ugo Pozzan che, in un secondo momento, el vegnarà afiancà da Nils Liedholm ne le vesti de diretor tenico.
1967/68 Con Saverio Garonzi nóvo presidente del'Hellas Verona l'è Serie A!
1968/69 Con i zumèi del gol Bui e Traspedini el Verona resta in Serie A
1969/70 Grassie ai grandi gesti atletici del Brasiliàn Sergio Clerici "Gringo" el Verona resta ancora in serie A
1970/71 Verona ancora salvo, 11° posto con 26 punti.
1971/72 El Verona se salva con la quota più bassa de la storia, 22 punti
1972/73 Ritorna Cadè alenadór. El 20 majo 1973 Gianfranco Zigoni "Zigo-gol" e compagni (da segnalàr Luppi e Sirena tra le fila gialo-blù) i vinçe col Milan al Bentegodi (5-3 el risultado final) e gnénte scudeto ai rossoneri...."la fatàl Verona", vista la contemporanea vitoria de la Juve su la Roma par 2 a 1.
1973/74 El canpionato de la "telefonada" de Garonzi a Clerici prima de Verona-Napoli. El giudice sportivo penalisa el Verona che vién spedì in serie B, nonostante la salvessa meritada sul campo.
1974/75 "Pantofola" Roberto Mazzanti nel sparéjo col Catanzaro regala la promossión in serie A al Verona. Rapimento de Saverio Garonzi a le 19:20 del 29 genàr 1975.
1975/76 Grande capitàn Paolo Sirena e grande salvessa, alenadór Ferruccio Valcareggi.
1976/77 9° Posto con 28 punti.
1977/78 Ultimo ano par Zigoni, Luppi, Busatta, Bachlechner, Maddè e Valcareggi.
1978/79 Verona retrocesso in serie B e Saverio Garonzi lassa el Verona dopo 13 ani de presidensa.
1979/80 Giuseppe Brizzi nóvo presidente del Verona.
1980/81 Celestino Guidotti "Tino" nóvo presidente del Verona e Cadè un altra volta ritorna come alenadór. Squadra massa zòena e se ris-cia la serie C.
1981/82 Ariva l'alenadór Osvaldo Bagnoli e el Verona vinçe subito el canpionato con Garella, Lely, Cavasin, Tricella, Oddi, Odorizzi, Manueli, Di Gennaro, Gibellini, Guidolin, Penzo, Vannoli, Ipsaro, Fattori, Fedele, Marmaglio, Valente, Guidotti e Piangerelli.
1982/83 Grande canpionato del Verona grassie ai novi arivi Guidetti, Dirçeu, Zmuda, Fanna, Marangon, Volpati, Sacchetti, quarto posto e "Coppa Uefa". Nel stesso ano "Coppa Italia" persa in finàl con la Juve a opera de Platinì.
1983/84 El bomber Nico Penzo a la Juve e in cambio "nanu" Galderisi, mentre da la Roma vien Maurizio Iorio. Grassie a questi du zugadori el Verona conquista la tersa finàl de "Coppa Italia". Dopo la grande partìa de Belgrado el Verona va fóra da la "Coppa Uefa" a opera del Sturm Graz.
1984/85 Verona Canpione D'Italia - Tino Guidotti presidente e dopo la splendida conquista del tricolòr deventa Fernando Chiampan. Bagnoli alenadór e i "Canpioni" jè: Garella, Ferron, Marangon, Tricella, Fontolan, Briegel, Fanna, Volpati, Galderisi, Di Gennaro, Elkjaer. Completava la rosa: Spuri, Sacchetti, Bruni, Donà, Marangon II, Turchetta. 43 punti in 30 incontri con 42 reti fate 19 subite. 15 Vinte, 13 paregiade, 2 Perse.
1985/86 Unica partecipassión del Verona in "Coppa Campioni". Dopo la vitoria con el PAOK de Salonico, el Verona se cata davanti la Juve, 0-0 al Bentegodi e nel ritorno "a porte serà" a Torino 2-0 par i bianconeri. Protagonista de quest'ultima partìa l'arbitro Wurz che ghe ne combina de tuti i colori e Verona va fóra da la competissión. Squadre indebolida dopo la partensa de Fanna, Garella e Marangon e 10° posto in canpionato.
1986/87 Novi zugadori i vién inseridi par rinforsàr la squadra "Pablito" Paolo Rossi, Pacione, De Agostini e Galia e el Verona conquista el 4° posto con 36 punti e se torna in Europa.
1987/88 Roberto Tricella, capitàn del Verona campione d'Italia, el va a la Juve con De Agostini. I tifosi i scominsia contestàr el presidente Chiampan. In canpionato el Verona termina al 10° posto. Grandi sodisfassioni in Coppa Uefa. Elimina el Pogon Stettino (1-1 in Polonia, 3-1 al Bentegodi), l'Utrecht (1-1 in Olanda, 2-1 a Verona) e lo Sportul di Bucarest (3-1 in casa, 1-0 in trasferta). Vién fermà nei quarti dal Werder Brema, che vinçe 1-0 al Bentegodi e paregia in casa 1-1.
1988/89 La squadra se piassa a l' 11° posto con 29 punti dopo dure contestassioni a Chiampan.
1989/90 Retrocessión in B. El Milan perde a Verona 2 a 1 la partìa e 'l scudeto ne la "fatàl Verona".
1990/91 Fernando Chiampan vende la società a la "fantomatica" Invest de Milan. Presidente deventa Angelo Di Palermo che poi lassa a Emyl Mirzhakanian. A tiràr le fila de la Invest l'è Roberto Uzzo. El 21 febràr 1991 el Tribunàl de Verona dichiara el falimento del'Hellas Verona. Fascetti compie un autentico miracolo e riporta el Verona in A.
1991/92 Una nóva propietà crompa el neonato Verona Football Club. Presidente deventa Stefano Mazzi. I vien crompadi i stranieri Stojkovic e Raducioiu. Ma el Verona ritorna in B, nonostante la guida tenica la sia passà a Nils Liedholm e Mariolino Corso.
1994 El primo derby col ChievoVerona "Ceo", el 10 diçembre 1994 finisse 1-1.
1998 Al'inissio del 1998 vien vendù la squadra al novo Presidente Gianbattista Pastorello.
2001 El primo derby in serie A col Ceo, el 18 noémbre 2001 finisse 3-2 par l'Hellas.
1903-2003 El Centenario