Ai tempi de... Renato

Quando: 25 Otóbre 2023

I ricordi de Renato.

Renato, nato prima de la seconda guera mondiàl, el ne porta indrio nel tempo, e quando l'éra buteléto, in quei ricordi bèi ma anca de bruti, de come l'éra Verona in quel periodo. Podémo capìr come se riussiva a gòdarse con poco o èssar in mèso a una guera coi oci de un bocia. Verona cambià nel tempo dopo i austriaci a metà de l'800 che i è riussì a modificàr la çità, la prima e la seconda guera mondiàl l'à fato ben pèso, co' la distrussión de ponti, case, palassi, ecc. No te resta che entràr nei ricordi con Renato....

EL CARBONASSO
Quando no te g'avèi paura dei bissi

…..L'éra uno dei bissi che girava sui bastioni par cercàr qualcosa da mètar soto ai denti e noialtri, de la maraja dele case popolari de S.Bernardìn, sempre con la sfiondra in scarsela, tuti i pomerigi ghe daimo la cacia.…Pora bestia, ….l'era un serpentìn tanto inoquo quanto l'èra nero, longo poco più de mezo metro e largo come un deolòn del piè de un omo grande e quando el vegnea 'isto da noialtri, el se meteva a sbrissiar de bruto, in meso a l'erba e tra i sassi fin che el se ficava drento a un buso o in un crepo nel vecio muro austroungarico, e par tri giorni non te lo vedevi più végnar fora dal gran spavento che l'aveva ciapado, par el casin che ghe s'aveva creado intorno. Apena vedeimo moarse l'erba, tuti nojaltri sigando e con la sfiondra in man, cominçiaimo a tirarghe de quele sassàde e marocolàde spaventose e nissun, par fortuna, el le ciapava. ….Dai, …ciapa la sfiondra e tireghe …ecolo là , ….tireghe 'na matonàda… ma sta atento, …non sta a andarghe viçin …. parchè el te morsega, …e, …se el te invelena ….dopo te mori. ….Pora bestia …Nissun el n'avèva insegnado che quel bisso lì, l'èra 'na bestia inoqua e l'unica so preocupassion, l'èra quela de ciapàr e de magnàrse in pace qualche usértola , qualche gril, o qualche sentaìn. Forse parchè l'èra nero come el carbon, o forse parchè g'aveimo sempre in testa l'imagine de la Madona che la pesta el serpente con i piè,….par nojaltri bociassa,…. el CARBONASSO, …l'èra 'na bestia da copàr! Un giorno, mi e i me amigheti de l'epoca, g'avevimo séte oto ani, semo andadi a çercar el carbonasso con le sfiondre in man e con le coraméle sempre cariche de bei sassi tondi. " i sassi i vegnea sielti con 'na grande precisiòn, in mezo a la strada fata de tera batuda e de sasseti de tuti i calibri" …Eco, che dopo un par de ore de ricerche, vedemo 'na còa longa e nera che la camina, ….sssst ….sssst…..fasì silensio , …..'sta volta lo ciapo vivo, g'ò sigado drio ai me amici, e mi, che non g'ò mai avudo paura de gnente, cuciandome con la pansa par tera, pian pianin, me son avicinado, e con la man destra, l'ò ciapado par el col, tra i sighi de contentessa de tuti i mostri che me stava intorno: …alè alè….l'èmo ciapado,…alè alè….l'èmo ciapado…..l'èmo ciapado vivo. A dir la verità un poco de scagàsso ghe l'avea, anca parchè el s'avea rodolado tuto intorno al me brasseto, ma mi lo tegnea così streto, che par poco non lo strossava. …Lù ,…. che el s'à visto ciapado, e che i me dei i ghe strenseva sempre de più el col, el verzea la boca, e con 'sti du oceti, anca lori neri come el mantel del diaolo, el pareva che el me disesse: …ma cosa t'ò fato mi a ti? … parchè m'èto ciapado?…. Lasseme andar par la me strada,… su e zo par i me muri, …libero, …come te si libero ti e tuta quela bruta maraja scamùfa che te gh'è li intorno. …Mi non te smorsego e non te inveleno, ….son un poro can che gh'è in 'sto mondo, ….come in 'sto mondo gh'è tute le bestie de 'sta téra,…… compreso tì. Ma mi, non g'ò miga pensado più de tanto a quel che el pareva che el me disesse, e de corsa son andado a casa mia con 'sto troféo in man tuto ingarbuiado, ò sonado el campanel e ò slongado el brasso disteso davanti a la me facia. Quando me mama l'à verto la porta, e la visto 'sta scena, la butado i oci fora da la testa, la s'à messo le mane nei cavei, e la fato un sigo così forte e così penetrante che ghe l'ò ancora ne le recie e nel çervèl, dopo sessant'ani che l'ò sentido. Quela volta là, però, ò obedido al consilio che la m'à dà me mama, che, dopo essarse ripresa dal spaento, la m'à sigado drio con far imperioso e con voce ferma : …. Ciapa subito quel bruto bisso lì,…. e riportalo indrio, …vivo,…… da dove te l'è trovado, e dopo vien subito a casa a lavarte le mane! E mi, dopo la lessiòn che la m'à dado me mama, non g'ò più avudo el corajo de copàr, gnanca 'na formiga.

EL CINEMA MIÒLA
El mitico cinema parochiàl Esperia dito "Cinema Miòla"

Me ciàmo Renato, son nato nel 1938 e son vissùdo, fin a quando me son sposà con me mojér Marina, in via Massimo D'Azeglio 27 nel quartièr de San Bernardìn de Verona. .....Me ricordo, che quando g'avea nove/diese àni, ( l'èra apena finida la guéra), la più bela sodisfassiòn par noialtri "mostri", de la maraja de S. Bernardìn, l'èra quela de andàr al cinema Miòla. El cinema Miòla, l'èra el cine parochial, tacàdo a la ciesa de S. Zen, e a la domenica, se aveva fato el brao durante la setimana, me mama la me dava çento franchi de mancia, che regolarmente i servia par andàr a védar un film de indiani e de banditi. (i banditi i èra i cao boy), Apena finido de magnàr, nel primo pomerigio se trovavimo in una vintina de bociàsse, tuti de le case popolari, quele nove, parchè i buteleti de le case vecie, i fasea parte de 'naltra maraja: cercavimo de andarghe più presto possibile par èssar primi a ciapàrse el posto e dopo aver visto el film, do o anca tre volte, vignevimo fora verso le sète de sera con i oci tuti stralunàdi. Davanti a l'entrada, soto el volto de quarèi rossi, gh'èra sempre 'na vecièta sentàda su una careghèta picinina tuta despaiàda, con 'na çésta sgangheràda sui zenoci, piena de mioline de suca con el sal, faoline, limoni e rigolissie; la g'avea un sciàl nero su le spale con le franse longhe che tocava fin par tera e i guanti de lana grisa con i mèsi dei. Mi me comprava diese franchi de mioline e con i altri vinti franchi me comprava un limòn, 'na stecheta de rigolissia da pociarge dentro e creàr 'na specie de pocèto da ciuciàr e che noialtri buteleti consideravimo 'na otima bibita. I altri setanta franchi i servìa par tor el bilieto d'entrada. Prima che incominciasse el film, in sala gh'èra zà agitassiòn e quando se smorsàva la luce e se vedea a scòrar i primi titoli, te arivàva in testa, scorse de mioline, de faoline, giornaleti de Tex Viller, Pecos Bil, carte de caramele rodolade, torsoli de pomi e altre robe che vigneva fora da le scarsele. Dentro la sala gh'èra sempre do/ tresènto buteleti dai òto ai quindese àni, che arivava da tute la parti de la çità, e sicòme gh'èra diverse maraje dei diversi quartieri, i lanci de tute ste robe i vigneva indirissàdi maraja contro maraja in particolare tra quele de San Zén e de San Bernardìn, parchè el giorno prima, magari, i avea fato de le sassaiole così tremende che le andàa sempre a finìr con do o tre teste rote dai sassi de le sfiondràde. Ogni tanto se interompèa el film parchè el machinista el se indormensava e nol se n'acorsea miga che l'èra finido el carbonsìn ( l'eletrodo) e dopo un quarto d'ora che el sentiva un casìn de la malora e el se sveiava e el meteva su el novo carbonsìn e el film el continuavain mezo ai fis-ci. Quando sul più belo de la bataja arivàva i banditi, sempre capitanàdi da Jon Vain o Gari Cuper, se sentiva dei urli che fasea indrissar i cavèi, e tuti, a bàtar le mane e macàr i piè par tera su le asse de legno e a sigàr a squarçiagòla.... Arivano i nostri!.... Arivano i nostri.!...... ( non so miga parchè i banditi i g'aveva sempre rasòn! ). A quel punto,cominciava la vera guèra dentro el cinema con i limoni ciuciàdi precedentemente e altre robe catade su da tera, gh'e ne rivava da tute le parti e se par combinassion te ghe ne ciapàvi uno in facia o in un òcio te cainàvi par 'na setimana. Li, gh'èra da ridar o da pianzar, parchè: i smorzava la proiessiòn, i impissava la luce e vegnea dentro de corsa: el prete, la maschera, el biglietàr, el machinista e la perpetua, e tuti quei buteleti che vegnea cucàdi con calcosa in man, tra le minace de " dirghelo a to bupà e a to mama" i vegnea ciapàdi par 'na récia e butàdi fòra dal cinema MIOLA a peàde nel cul.

LE SCARPE REQUISIDE
El risarcimento

Nel mile-noveçento-quaranta scopia la II^ guera mondial e me bupà che l'èra de la classe 1999 non l'èra miga stado riciamado soto le armi, parchè la so guera, …el l'avea za fata sul Piave dal 1915 al 191, come fante mitraglièr. Me bupà el g'aveva sedese ani e l'èra stado uno dei ultmi ciamadi , i più veci i l'avea copadi quasi tuti e el fasea parte dei famosi "Ragazzi del 99". Dopo che l'èra stado diretor, de la botega de scarpe del calsaturificio de Varese in via Nova, (adesso via Mazzini) me bupà Marco l'avea tentado la grande aventura, e el s'èra messo par conto suo, versendo 'na botegheta de scarpe in via Roma, al N° 10 a Verona. La botega l'èra intitolada: SCARPE BUSELLI: el lavoro nol mancava miga, el s'avea fato la so afessionada clientela e de conseguensa gh'èra anca un discreto guadagno. Nel corso de la II^ guera, Verona la cominçiava a éssar bombardada dai aroplani inglesi e americani e incominçiava a essarghe i primi sinistradi, (quei che i g'aveva butà zo la casa nei bombardamenti). El podestà de Verona un certo Soffiati, l'avea fato un edito che tuti i comercianti i dovea portar la so roba nela sede fasista e tuti i comercianti ià portado dela merce par darghela ai pori sinistradi che i èra restadi in braghe de tela e i g'avea bisogno de tuto: da le mudande, al vestito, dal capèl a le scarpe. Dato che la botega l'èra così picola che gh'e stava dentro poca roba, me bupà el g'avea un magasineto proprio ne la casa de l'abitassion in via Massimo d'Azeglio a le case popolari de S.Bernardin. A un certo momento dela matina i sona el campanel, ….chi èlo? …semo noialtri, risponde 'na voceta angelica, e me mama, ignara, la verse la porta credendo de trovarse davanti un qualche amigo de me bupà, e imediatamente è entrado in casa sigando, un squadron de camise nere cative come le bestie e con el mitra spianado contro me mama e me sorela Liliana, che la g'avea quatordese ani e i s'à fato consegnar tut , ma proprio tute, le scarpe che gaveimo a casa, comprese le scarpete che i mei i m'avea tignudo daconto par la me prima comunion. I n'à lassà un toco de carta con sora scrito: 140 para de scarpe de la dita Buselli requiside in favor dei sinistradi veronesi, del valor comercial 24.000 franchi, da pagar a fine del conflito. Tanto par farla curta, dopo tri giorni, tuti i gerarcheti de Verona e le so manutengole, i g'avea intorno le scarpe de me bupà e i sinistradi, i andava in giro ancora con i so scassadi socoli. A fine guera…..finalmente i à risarcido me bupà …..con çento franchi.

R.C. RIFUGIO CANTINA
Ricordi del dopoguera

Quando giro par la çità de Verona e me guardo in giro, ogni tanto vedo in fianco a calche porton de calche vecia casa ,la sigla R.C. pituràda in bianco su campo rosso. Veci ricordi del tempo de guèra: sento ancora ne le recie i diese colpi de la sirena:...uuuuuhhhuuuu .....uuuuuhhhuuuuu ....Atension,... ariva i aroplani, ...scapèmo zo nel rifugio,... ecoli,... ecoli,...e tuti i scapava da tute le parti e in tute le diressioni. Subito dopo se sentiva un rumòr, un rombàr ondulado, terificante, che el te entrava ne le recie alternado da calche canonàda de la contraèrea. I èra un çentenàr de bombardieri 'mericani che vegnea dal sud e che andava in Germania a bombardàr le çità todesche passando par Verona e par èssar più legéri i scaricàva calche pìrola anca sora le nostre teste. I èra così tanti che i oscuràva parfìn el sol. Mi, stava de casa viçin a la stassiòn feroviaria, a le case popolari de S.Bernardin e anca davanti al porton de casa mia, gh'èra la sigla R.C. che volea dir Rifugio Cantina. El rifugio cantina non l'èra altro che la cantina de la casa e che, se par combinassiòn, ghe fusse vignù in sima n'a bomba, te sbalài come un rato, insieme ai rati che te coreva tra le gambe; parchè in cantina gh'èra anca el scarico de le sgaùie condominiali e i rati, ansi le pantegàne, in tempo de guèra non le trovava miga tanto da rosegàr, ma se vede che par lore l'èra abastansa, parchè i èra longhe meso metro e i èra grasse come un porco. Me ricordo che un giorno, verso le òndese de matina, è sonà l'alarme, la sirena l'èra proprio sora la me casa e quando la tacàva a sonàr i diese colpi, te entràva el fis-cio parfìn dentro le buèle e, el te restàva dentro par de le ore. Alora te sentivi 'n'a confusiòn de la malora: tute le fameje le coreva zo par le scale con i fioi in brasso e tuti i sigava , le done saltando tri scalini a la volta par andar a ciaparse el posto so in cantina,...fè presto... dai forsa... corì, le incominciava a pregàr a voce forte, e più le sigàva più se creàva confusion. I omini i tirava dei mocoli impressionanti contro i 'mericani, contro i todeschi e contro tuti, anca contro le mojer parchè le faseva massa casìn. Ma molte fameje le scapàva soto ai bastioni dove gh'èra dei covoli abastansa sicuri e là, arivàva de tuto, tanto par cominçiàr arivàva de corsa un frate dal convento de S. Bernardin che el cominciàva a scaricàr litanìe con el Rosario in man ....Ave Maria, e tuti, ...Ora pro nobis!. Arivava i soldadi tedeschi e italiani che i vigneva dal casermagio de fronte, arivàva qualche vecia portàda su 'n'a barela de fortuna, parchè l'èra malàda, arivàva i operai de Vengril, quel de l'oro; i tedeschi i maledìva i americani, i italiani i maledìva i todeschi e tuti i maledìva qualche d'un altro;...e le done le continuàva a pregàr terorisàde....Ave Maria. E noialtri bocia rideimo tra un s-ciafòn e l'altro parchè non se rendvimo conto de la gravità de la situassiòn. Gh'èra anca quei che maledìva i fasisti e i nasisti, ma i le maledìa pian parchè dentro al rifugio gh'èra anca qualche gerarchèto che se el volèva el te mandàva in Germania, a passàr le ferie in qualche campo de concentramento.Finalmente quando tuti i sigàva de far silensio, par sentìr se el rumòr de i aroplani l'èra finìdo, se sentìva i liberatòri tri colpi de sirena e tuti:done ,omeni, operai, soldadi e frati, con la promessa de portarghe un cero a la Madona, i tornàva da dove i èra vegnùdi, aspetando el prossimo alarme.

LE SASSAIOLE
La guera tra bande

L'èra apena finida la seconda guera mondial e noialtri buteleti andaimo za a scola, a le Messedaglia nel quartier de S. Bernardin, dove èrimo nati e vissudi. Apena el bidèl el sonava la campanela, coreimo a casa, magnaimo quel che le nostre mame le ne metea nel piato e quando aveimo finìo de far i compiti e i pensi che ne dava el maestro Stefani ( el ne faseva scrìvar çento o dosento volte :"mi son un asino" e altre frasi del gènare ) scapaimo sui bastioni, viçin a le case popolari e li, se organisava la sassaiola contro i Sanzenati, che a l'epoca ve lo digo mi, i fasea paura solo a guardarli. L'organisassiòn paramilitar dei Sanbernardinati l'era formada dal capo Pino Speri che l'èra za grande, el gavea dodese ani e l'èra soranominado: Pino Bareta capitan dei mostri e l'èra aprendista falegname a Don Bosco. El logotenente del Pino Bareta el se ciamava Silvano Fraccari cosideto El Ciba e, par torlo par el cul, dato che el g'avea la testa un pochetin longa, l'aveimo nominado testa da somergibile. Tuti i altri (èrimo in çinquanta o sessanta buteleti), i èra semplice trupa e i più picinini i èra i portasassi. Tuti noialtri gaveimo de le sfiondre, che adesso le podaria benissimo star in calche museo de le armi; le più bele e che tirava più distante i èra fate con una forcela de legno o de fil de fero grosso, du par de elastici a session quadrata che se comprava da Pirelli in çità e che costava 'na fortuna, e 'na coramela fata con un toco de scarpa vecia, calche d'un el g'avea i elastici fati con i elastici de le mudande, compradi da la marcantina, rodoladi tra de lori, i costava pochi schei ma non i valea gnente.. El problema più grosso i èra i Sanzenati, lori non i èra miga organisadi ,ma i èra intrupadi in maraje de çento, çentoçinquanta butei e buteleti, quasi tuti sinistradi par le bombe e la major parte de lori non i andava più a scola e i g'avea dai oto ai quindese ani, i più picinini non i le volea miga. Lori i èra sempre sul bastion più alto, quel che el guardava verso S. Bernardin e noialtri èrimo sempre soto, ne la ex caserma dei bersaglieri, dove adesso gh'è el lavagio rapido in via Maroncelli. Li se incominciava a tirarse i sassi in tute le maniere. Chi con la sfiondra, chi con le mane e chi con la lanciasassi fata da du spaghi de mezo metro e un coramelòn, che fasendola rotear par un pochi de giri, se lanciava anca dei sassi de mezo chilo, a la distansa de çinquanta sessanta metri. I più fifoni e i più picinini i se metea in testa el primo elmeto militar tedesco o italian che i trovava in giro, i altri i se butava ne la mischia tra deçine de sassi che arivava da tute le parti e de tute le misure. Dopo un poco che l'èra cominciada la sassaiola, saltava fora le mame da le porte de casa e sigando come dele grole spelajade, le ne corea drio, anca lore tra 'na nuvola de sassi, minaciandone de dirghelo a nostro bupà, ma noialtri scapaimo e ricominciaimo a sassàrse..e sigar : "a morte i Sanzenati", tuti i sigava, tuti i scapava e tuti i tirava sassi in tute le diressioni. Par farla curta, a fine de la batalia gh'èra sempre du o tri buteleti con la testa rota o con un ocio stupado, non contando le sassade che se ciapava sul corpo e su le gambe, anca parchè se portava le braghe curte e se vedea tute le macie nere........A la sera tuti in castigo fin a la prossima. Eco, questa l'è 'n'altra storia de la me infansia, che ricordo con un poca de nostalgia,

EL TEATRO FILARMONICO BRUSÀ
L’èra la note del 23 de Febràr del 1945 e mi g’avea 7 ani

Me bupà Marco el g’avéa la boteghéta de scarpe in via Roma n°10, propio de fassada al teatro Filarmonico, ( ‘na volta, la strada, la se ciamava via Teatro Filarmonico, ma i fassisti i avea voludo rinominarla via Roma, par onoràr la capitale d’Italia: in ogni çità e paese Italiàn, doveva éssarghe una via Roma ). Ogni tanto, su la çità, gh’èra un bombardamento da parte dei bombardieri americani e inglesi, che i se godea a descargàr, scaretàde de bombe su la pora gente e su le case de Verona. L’èra note fonda:…..CORI Renato ….CORI!…..salta sul stangòn de la biçicleta , ….quei bruti porchi,….i à bombardado el teatro Filarmonico,…… l’è drio a brusàr.!!!!…..FORSA!….. CORI! …..che andemo a vèdar cosa sucede. !!!…..Speremo che non s’àbia brusàdo anca la nostra botega, ….. se no, ’sta volta… semo rovinadi.!! Me meto su le braghe curte e ‘na majèta e in pressia monto sul stangòn de la biçicleta de me bupà, una Taunus bianca nova de bala con i freni a stangheta e le rude a “meso balonsìn”, salvàda par caso da la requisissiòn dei tedeschi, (i kruki i cominciava a scapàr via parchè stava arivando i americani, e i requisiva tuto quel che g’àvea le rude par “tajar l’angolo” più in pressia). Me bupà Marco, par far presto, el pedalàva come un mato , el me inondava la me testina de gosse de sudòr bolente, parchè doveimo andàr in via Teatro Filarmonico e partendo da le case popolari de S. Bernardìn gh’èra da far çirca du chilometri e essendo note e con “l’oscuramento” in ato, non se vedea gnente de gnente. Za da distante se vedea el fumo denso nero e grigio e a man a man che se aviçinaimo l'entrava, acre, su par i busi del naso e drento, sempre più drento fin so in gola, quasi a stofegàrne. e un bagliòr rosso, gialo e aranciòn, che el parea un vulcan in piena erussiòn drio a scopiàr. Semo quasi in fondo al corso Antonio Provolo, un altro pàr de pedalàde e quando semo arivàdi a Castelvecio svoltemo a destra par entràr in via Roma, e subito un fetòr de stofa, de legno e de vernisa brusada, la n’àvea investido fasendone lagrimàr i oci; e tra le lagrime drento ai oci e el fumo nero non se vedea più gnente, l’èra come a entràr in una caverna infumegada, solo fumo nero, spussolente. L’èra così nero che el oscurava la vista, el serava la gola e el ne fasea tossìr e stranudàr come se fussimo al massimo sfogo de un potente rafredòr de primavera. Me bupà che l’èra preocupado par la so botega, (el g’avea paura che la se brusasse anca ela) l’à tirado una serie de mocoli imprecando contro tuto e contro tuti, contro i tedeschi che non i èra gnancora scapadi in Germania e contro i americani che i butava le bombe dove capitava. (non i aveva gn’ancora inventado le bombe chirurgiche). Arivàdi a la botega, da la parte de la de la strada, se vedea lengue de fogo alte çento, dosento metri e insieme al fogo, scapava su anca tochi de stofa infiamàda, missiàdi a sdinse de oro e argento che le pareva quei bei foghi artificiali che i fa ne le sagre dei paesi. Mi, guardava lagrimàndo e tossèndo, ma me godea ànca, a vèdar tuta sta confusiòn, tuti ‘sti bei slusini che scopietava e le sdinse che volaa come le luciole ne le noti calde de l’istà e che le andava in su a tuta velocità, par mi l’èra un gran spetacolo. La zente che gh’èra li intorno a distansa quasi ravicinàda, la guardàva, la sigàva, la imprecàva e quando ogni tanto la sentìva un scòpio de qualche busolòto o de qualche recipiente che gh’èra drento al teatro, la scapàva come scapa ‘na mandria de vache impauride e dopo pian pianìn la tornàva tuta insieme a imprecàr, a guardàr e a sentensiàr su quel’oribile disastro provocàdo da un misero, picolo,… ma maledèto ….“spessòn incendiàrio”. Poro “ Teatro Filarmonico”, i l’à fato su nel 700 sui disegni del Bibiena, drento g’à sonàdo artisti come Mozart che l’èra un buteleto, Salieri e i mejo artisti ghe gh’èra su la piassa….…..Poro teatro, l’à ciapado fogo nel 1749, ma dopo parò, l’è stado rifàto tale e quale de come l’èra prima. Ne la note del 23 Febràr 1945, l’è stado bombardàdo , e dopo mile peripessìe, l’è stado ricostruìdo apena che quei de l’Academia Filarmonica i à trovado i schei par farlo su ….nel 1969, …..dopo 24 ani.. Speremo che la sia l’ultima volta.....

NADÀL NEL DOPOGUERA
I preparatvi natalissi

I Preparativi par festegiàr el Nadàl, i cominciava un mese prima de l'Avenimento. L'èra apena finida la guera e gh'èra un poco più de tempo, da pensàr anca a festegiàr le feste comandàde. A casa mia non èra mai mancado gnente, gnanca nei tempi più bruti del conflito mondiale; me bupà Marco, a la matina a le çinque el se alsava dal leto, e prima de vèrzar botéga (gaveimo una boteghéta de scarpe in via Roma) el inforcava la so bicicleta "Taunus" e el andava fin al setimo chilometro, verso la Croce Bianca, da un brao contadìn che el se ciamava Remigio, a tor un poco de late par mi e me sorela Liliana, che la g'avea sete ani più de mi, ma a mi la me parea sempre 'na buteleta da zugarghe insieme, e sempre in biçicleta, el andava fin a Zevio e fermandose ne le varie corti dei contadini, el riussìa a compràr al marcà nero du o tri brocoli, un tochetìn de carne, calche ovo de galina, un scartosso de farina e calche volta el vegnea a casa anca con una fassineta de legna, par far andàr la stùa, ligada al stangòn de la bicicleta. Alora, el pensier più grande, l'èra quel de far el presepio: gh'èra da andàr par mus-cio, çercàr i sassi giusti, da pituràr la carta da pachi par far la grota e la finta rocia, gh'èra da tajàr fora le stelete con le cartine dorate de le caramele e tacàrle su dei fogli de carta blu recuperada in calche maniera, par far el çièl. Quando me bupà a la sera, el serava botega, el corea in pressia a casa e subito dopo aver magnado un bocon, el cominciava a costruìr, quel che gh'èra bisogno par far un presepio con la P maiuscola. Con el segheto del traforo el fasea le casete, con i troncheti dei rami i albareti, el fogo finto, l'aveva fato anca una ruda del mulìn a acqua, con le pale fate de tocheti de lamierìn, taiadi fora da 'na scatola de sardine ùda. Quando me bupà el sa inventà de dirghe a me mama Aldina che el volea far el presepio con l'aqua vera, è vegnù fora mezo putiferio,...Sito mato Marco... seto che spocegaménto ....chi èlo che tira su tuta l'acqua che va fòra?.... Ormai in cusina non se ghe sta più!...Puoréta, la g'avea rasòn, gh'èra za meza cusina ocupada dal palco del presepio fato de asse a de casse de legno, e a pensàr anca a l'acqua che sarìa cascada sul pavimento, gh'è vegnea par fin mal. Dopo 'na mota de discussioni, me bupà el gh'e la avuda vinta e alora, l'avea tacado 'na caneta de goma al rubineto che gh'èra sora al seciàr, e l'aqua, dopo aver fato la cascada, fato andàr el mulin e creàdo un lagheto con soto el specio, la andava a finìr in un secio de fero che gh'èra soto al palco, e mi, èra incaricado de udarlo ogni volta che el se impinìva. El çiel e el sfondo, i èra fati con de la carta blu tuta sbusada con un fero da calsa, de drio gh'èra la lampadina e quando se tirava zo la saracinesca e se smorsava la luce se vedea tuti 'sti buseti inluminadi che i parea de le vere stele. Mi èra incaricado anca de mètar zo le pegorete e i personagi, ma quando andavo in leto, me bupà, de scondòn e sensa dirme gnente, el le spostava con la scusa che i èra massa muciadi. .....Nadàl,....el presepio,...finalmente l'èra finido: ..l'aqua la andava ,..el mulin el girava,..l carion el sonava,..el Bambin Gesù gh'e l'avea messo dentro la so cuna. Za da la matina la me casa l'èra invasa da tuti i buteleti de le case popolari con le so mame, che vegnev a vardàr e a amiràr 'sto capolavoro, e mi, sodisfato e tuto orgoioso de aver fato con la bravura de me bupà e con la pasiensa de me mama, el Presepio più belo del mondo.

EL BACALÀ
La grande festa a base de Bacalà

L'èra l'ano milenoveçentoquarantaçìnque e la guera, finalmente, la stava par finìr. Mi g'aveva çirca sete ani e me ricordo che me bupà Marco, el parlava sempre de un bacalà seco, intiero, longo mezo metro, che l'avea comprado sotobanco da un salumièr, che a so volta el l'avea comprado anca lu, da un altro salumièr, al mercà nero, e, a forsa de passagi l'èra vignùdo a costar un ocio de la testa. De bacalà non gh'e n'èra miga in comercio, quel poco che gh'èra in giro, l'èra tuta roba de sfroso. Dato che i caporioni de l'epoca, ogni tanto i faseva irussiòn ne le case par vèdar se gh'èra roba comprada sensa punti, (tuti i italiani i g'aveva le tessere coi punti par compràr el pan e tuto quel che l'èra roba da magnàr) me bupà par la paura de èssar mandàdo in Germania a far le ferie in qualche campo de sterminio, ( averghe un sacheto de farina l'èra za abastansa par far la "gita"a màca), l'avea sconto el bacalà in mezo a de le scatole de scarpe vecie e ogni tanto l'andava a vardarlo, nasàrlo, e, anca se el spussàva, el ghe sbavàva in çima aspetando la bona ocasiòn par cusinàrlo a la visentina e sbafàrlo insieme a tuta la so fameja e con qualche amigo intimo, far la grande festa a base de bacalà. … Marco , la implorava me mama, …magnemolo in pressia 'sto "pèsse baùco"!, parchè prima o dopo i ne le càta e alora stemo freschi, ….i ne manda tuti in galèra. E me bupà, el ghe rispondeva con la sicuressa de uno che savea el fato suo: …Dina,… prima che i le trova i deve passàr sul me corpo ….e prima che i passa sul me corpo,…. noialtri,…. l'avemo za magnàdo e digerìdo da un tòco, ….fra poco, la guera forse la sarà finida,…. e alora ghe daremo dentro, e faremo 'na bela scorpaciàda con la polentina calda. E tuti 'sti discorsi i è andadi avanti par dei mesi, e me bupà, ogni tanto, el andava a sghimàrse la so "preda seca" con l'aquolìna in boca, sognando e agognando la gran magnàda,de polenta e bacalà. A la notissia che gh'è stado l'armistissio, i me genitori i à deciso de cusinàr el famoso "pesse veloce del mar Baltico" par festegiàr l'avenimento: Era finida la guera; i à comprado l'oio, l'aio, el pressemolo, el late, un tocheto de formajo grana, le aciughe e un chilo de polenta giala, i à parfin tirado fora la panara col fìl …e:…. …..Dina , ..èco! …l'à dito me bupà,….l'è arivà el momento , e ciapàndo el so bel bacalà spussolente par la còa, e con un gran sorìso,… el ghe l'à messo in man a me mama. ….Marco…la g'à risposto éla con 'na vocina tremante…. el me par... legeréto!.….E me bupà:….ostrega, …l'è legereto.. parchè l'è un prodoto de prima qualità !…. non te vedi miga che l'è un bacalà ragno… i bacalà ragno,… i è sempre stadi più legeri de quei altri. Quando finalmente, i s'à deciso de tajarlo par metarlo in moja ne l'acqua fresca, ma par poco non i cascava tuti du par tera svegnudi, par la grossa delusiòn che i aveva ciapado, quando i s'àveva n'acorto, che del famoso e sospirado bacalà, gh'èra restado solo la pèle e i ossi, parchè la cicia, la se l'aveva magnà tuta le tarme!!!

I BANCHETI DE SANTA LUSSIA
Luçi, zugàtoli e mandolato

'Sta storia, la me porta indrio de çinquantaçinque sessant'ani. Par mi, quando raconto qualcosa de quando èra buteleto, el punto de riferimento, l'è sempre la seconda guéra mondiale, parchè quando ò cominçiàdo a averghe l'uso de la rason, e cominçiavo a averghe un poco de caratere, g'aveva za çinque sie ani, gh'èra ancora la guéra e mi èra ancora un butìn e non aveva gn'ancora capido che Santa Lùssia l'èra me mama, e, el gastaldo l'èra me bupà. Me ricordo sempre l'euforìa de quando se aviçinava el tredese dicembre: Santa Lùssia. Na giornada magica, 'na giornada che noialtri buteleti aspetavimo da un ano a l'altro e verso i diese, ondese de dicembre, incominçiavimo a far i bravi e i boni: ..."Fa el brao, sèto, ...Renato,... parchè se nò, S. Lùssia inveçe de portarte i zugatoli e i momòni, la te porta un saco de carbon"....Mi andava in cantina ogni giorno a tor su un secio de carbon par far andar la stùa, e pensar de averghe par regal un saco de carbon me vigneva le scarèsse. ....Renato, el m'à dito me bupà, con 'na voce imperativa ma lusinghiera: doman andemo a vèdar i bancheti in piassa Bra! Mi non me ricordava de averli za visti, i bancheti; èra così picolo che g'aveva solo in mente de zugar con le picie o con i birili che tigneva d'aconto come i fusse un tesoro. La sera verso le siè, de l'ondese diçembre mi, me mama, me bupà e me sorela Liliana, semo andadi a vedar 'sti benedeti e promessi mile volte, bancheti de Santa Lùssia. Mi èra imbaretado come un orso, un cappelin fracàdo sui oci, 'na siarpa de me mama e un paletò comprado in cressar, che el me arivava fin a le caviglie. Par strada gh'èr 'na nebia che te podevi taiarla col cortel da fissa che l'èra e un fredo can, ma un fredo can, che non ò più sentido ne la me longa vita. A man a man che se avicinavimo a la piassa , in via Roma, dove me bupà el g'aveva la botega de scarpe, se incominciava a sentir un odorin de mandolato e de crocante che el te andava su par el naso e che el te impregnava tuta la roba che te g'avevi adosso, e tuto 'sto profumìn el durava 'na mota de giorni. Eco,... la piassa; eco,... i bancheti, eco che el miracolo el s'à averà: ...luci...Bambole, cavalini de legno piturado, caramele, mòscoli, rigolissie de tuti i formati trenini a mola e 'na mota de zugatoli che adesso i bocia moderni, i te le tirarìa drio. Mi aveva adociado una automobilina che la andava con la susta e g'ò sbavàdo sora par un quarto d'ora, ma el me desiderio più grande l'èra quel de averghe 'na pistola a tamburo, come quela che usava Jon Vain, e che la tirava de le nose impressionanti. La me sarìa servìda par zugàr coi me amici più grandi che i ghe l'aveva za, parchè Santa Lùssia la ghe l'avea portada l'ano prima. Mama,...dighe a Santa Lùssia che la me le porta;...Vedaremo,... se te starè bravo e bon e te ghe lo scrivarè ne la leterina, ...forse, la te le portarà!.....bupà, ....dighe a Santa lùssia che la me porta anca i soldatini, un pinochio de legno e 'na steca de mandolato,.....e zo così par tuta la sera. Quando semo tornadi a casa strachi morti e con i diaoleti, ( i diaoleti i èra dele tremarele da fredo, che te vegnea su le ponte dei dei, che te parea de averghe çento uce soto le onge ) ho messo le me manine sora la stua calda fin che me son intiepidido e subito dopo i m'à messo nel leto a pena scaldado con el prèo, con la racomandassion de tignèr i oci seràdi, ma seradi forte, parchè se nò, el gastaldo, el te butava in facia 'na smanàda de sabia ..... ( adesso i ghe ciamarìa terorismo psicologico e i genitori i andaria tuti in galera parchè i butini da tri ani i ciamarìa el telefono azuro). A la matina non te digo, apena ò sentido sonàr la trombeta ,èra sveio za da un toco, son saltà zo dal leto e pien de fifa, son entrado in cusina e me son messo a sigar come un mato; Eviva.. eviva... ghèra la pistola, i soldatini in çima a 'na fortessa de legno fata a man da me bupà, caramele, naranse, nespole pomi e pastafrole. Ma quel che m'à impressionàdo de più e che g'ò ancora in mente, l'è stado el piato sporco con dentro un osso de galina, li viçin gh'èra mezo bicier de vin rosso, un poca de paia e un stronso belo rotondo, messi li sul pavimento.....Santa Lùssia , el gastaldo con el so musso, i èra vignudi a casa mia dal bon.

LA BOMBA
Desgrassie, dolòr e làgreme

Mi a l'epoca g'avea sete/oto ani, l'èra apena finìa la guera e le varie maraje dele case popolari de S.Bernardìn,dopo la scola, le andaa a zugar sui bastioni che gh'èra li viçin ….Bastava traversar la strada. I todeschi prima de scapar in Germania da dove i èra vignudi, i avea fato saltar par aria el casermagio, che el se trovava, e el se trova ancora adesso, de fronte ai bastioni, e dato che dentro al casermagio gh'èra de tuto, comprese çentinara de casse de proietili, palotole e bombe, tuta 'sta roba la s'avea sparsa li intorno e in particolare sui bastioni e dal casìn politico che ghèra, nissun èra vignudo a bonificar. I bastioni.. i èra el campo zughi, de tuti i buteleti, più o meno de la stessa età, che oltre che andar a zugar a scondarse o a saltamoleta o a far qualsiasi altro zugo pitoco che gh'èra in quel periodo, i se godea a zugar con quel che i trovava par tera: ……le bombe ! Sui bastioni se trovava de tuto: bombe, granate inesplose, palotole de tuti i tipi, de mitralia, de fusil e de pistola e 'na mota de residuati belici da le forme più strane. El zugo più interessante e più entusiasmante, però, par noialtri mostri, l'èra quel de scaricar le bombe par cavarghe la balestite, e la polvar nera, e con quela, messa nei bussoloti de conserva udi, faseimo i foghi opure la usaimo come micia par far scopiar de le altre bombe; insoma, g'aveimo si, sete/oto ani, ma èrimo za artificieri specialisadi. Me ricordo che qualche nostro amigo anca più grande de noialtri, zugando e rimissiando 'ste palotole e 'ste bombe, el sa brusado la facia o la perso qualche deo, qualche ocio, e anca qualche man. Ma el pol anca ciamarse forunado, …parchè , …adesso, …ve conto cosa è sucesso……..: Un giorno, un maressial de l'esercito, con tanto de divisa, l'èra vegnudo sui bastioni con i so tri fioi , de sète, nove e diese àni, par farghe 'na lession de "balistica" e, girando de qua e de la, el ghe fasea vedar i vari tipi de bombe e de granate, invitandoli a star atenti e de non tocar mai quei malèfici e terìbili ordigni, parchè, lù, che l'èra maressial de artilieria, el savea che el pericolo l'èra sempre in aguàto. …Guardè fioi,…questa l'è 'na granata de canòn calibro 75/13…queste i è palotole de mitraliatrice Breda…questa l'è 'na bomba a man S.R.C.M. ..e se apena la tochì, la scopia e la ve copa tuti tri insieme.…Quando vedì i altri buteleti che i zuga con 'sta roba, scapè via più in pressia possibile, parchè 'ste pirole qua, solo a guardale le pol scopiar…e,….le copa tuti quei che gh'è intorno! …E zo… racomandassioni par convìnsar i so fioi, de star a la larga da quei strumenti de morte. …Si bupà, ….te vedarè che noialtri non tochemo gnente,…non semo miga stupidi come quei là,… puntando el déo indice verso noialtri,.. che ormai conosseimo le bombe quasi mejo del maressial. Dopo du giorni, verso el pomerigio, noialtri de le case nove ( gh'èra anca le case vecie) èrimo sui bastioni indafaradi a zugar ai soliti zughi, a un çerto punto, avemo sentido un boato tale che 'n'à fato tremar el çervèl e incaponar la pèle e dopo qualche minuto, tute le done, le nostre mame le corea fora da le case con le mane nei cavei, sigando, par vedar dove i èra i so fioi.…Cos'èlo stado….cosa è sucesso!… L'è stada 'na bomba!…Come 'na bomba… Si 'na bomba , l'è scopiada sui bastioni …guarda che fumo!…..Renato, ..la m'à sigado drio me mama:… Vien subito a casa …e rivolgendose a quei altri buteleti:… farabuti… .lasaroni ….avìo finido de far i remenghi sempre con le bombe in man!…Lino, ..Franco,…Mario,…corì a casa anca voialtri …che gh'è le vostre mame che le ve çerca. ….via!! …via!! Tute 'ste done, chi strapegando so fiol par 'na recia e chi tirandolo par la camisa, le sigava come le anguàne dandoghe s-ciafoni sul muso e peade nel cul a noialtri bocia, che con la bòta che aveimo sentido, 'sta volta non ghe entraimo gnente, A un certo punto…. el silensio…………... Tute le mame e i fioi che gh'èra li intorno,… le sa fermado, e con la facia voltada verso la Signora Ceroni, …che piansendo, ma sensa dar in escandessense, …la portava in brasso el fiol più grande del maressial, …quel de diese ani.… con la pansa verta …e i oci spalancadi, pien de sangue che ghe sgorgava zo da le ferite che el g'avea su tuto el corpo, e de drio a la Signora Ceroni, caminava i du fradei più picoli, anca lori tuti insanguinadi , coi oci stralunadi e ancora rintontidi da la gran bota che i aveva ciapado.…( la sèna, la me ricorda la scultura de la pietà de Michelangelo che gh'è a San Piero a Roma, o la pietà che gh'è dentro al "mortuario" ne la cesa de S.Bernardìn a Verona ,…quando la Madona , con quela espression stravolta, ma quasi serena, la strense so Fiol tra i brassi,…. e la le guarda in facia par consolarlo… con quel sguardo dolçe, … pien de dolòr………. ) I tri fradéi i èra andadi a remenàr una de quele bombe che so bupà, maressial de artilieria, du giorni prima el g'avea fato vèdar e el l'avea pregadi de non tocàrle, ma lori, i èra tornadi sul posto, e, o par el spirito de trasgressiòn, o par védar se so bupà el g'avea rasòn, i à ciapà l'ordigno,e a forsa de bàtarghe sora, i l'avea fato scopiar, causando la morte del fradél più grande e el ferimento grave anca dei altri du fradelèti più picoli. A vèdar quel tragico spetacolo lì, a noialtri buteleti, n'è vegnudo el gropo in gola, e a le mame presenti a 'sta disgrassia, ……….se ghe vedea 'na lagrima posada soto i oci.

EL PIPPO
L'aroplan maledeto

Questa l'è 'na storia che se ricorda tuti quei che adesso i g'à dai sessant'ani in su. L'è 'na storia che i le conosse in tuta Italia parchè de Pippo ghe n'èra da par tuto, da Bolzàn a la Silcilia, da Torìn a Trieste e el vegnea tute le sere a ròmpar i cojoni. ....mmmmmmmm...zzzzzzzzz.... MMMMMM..zzzzzzz....,mmmmmmm....ZZZZZZZ..... MMMMMMM.....ECOLO!.....ECOLO! , .........fiol de 'na roja .......l'è za quà ....che Dio el le maledissa ...silensio,...ssssssst.....el dovarìa èssar lù,.....l'è ancora distante. .....MMMM....MMM.. ..MMM MM. .....MMMMM.. ...MMMM MM.. MMM MMM........Ci èlo bupà?.........Tasi! ( e intanto, me son ciapàdo un s-ciafòn su la còpa ). L'è lù .... tira zo le saracinesche e smorsa la luce che l'è drio arivàr.......Scapèmo zo in cantina, parchè quel fiòl de un can lì, anca 'sta sera el g'à el corajo de scaricaràrte su la molona, la so solite do bombe maledète ...e sensa preaviso. I èra tra le oto e le diese de la note, de un giorno qualsiasi del 1944. A un certo momento, se cominciàva a sentìr el ronzìo distante de un aroplàn che se avicinava,e tuti, con le recie tirade, i çercava de distìnguar se l'èra un càmion o un aroplàn. Conossùdo in tuta Italia, e che tuti i ansiani de adesso, i se ricorda ben, che quando i èra buteleti tute le noti el arivàva, terorisàndo i italiani: ......L'èra el "Pippo". ....l'èra uno dei tanti Pippo che quando cominçiava a vignèr scuro, i volava sora tute le çità a ròmparghe le bale a la gente mentre i stava çenando, o i èra drio ascoltàr qualche brano de òpera lirica, ne la trasmissiòn radiofònica de Martini & Rossi de Torìn o radio Londra. Nissùn à mai savùdo de che nassionalità l'èra Pippo: chi dise che l'èra american e chi dise che l'èra inglese, certamente non l'èra miga tedesco. Pippo, l'èra el nome che tuti i g'aveva afibiàdo, par çercàr de sdramatisàr el teròr che el instauràva quando el se fasèva sentìr.Nissun l'èra bon de stabilìr da dove el vigneva quel maledéto ronsìo ondulàdo che el te entrava ne le recie e che el parea: a volte sora la to testa, e a volte distante dei chilometri. Metendo el naso fora da la finestra de casa, se incominçiava a vèdar de le lance enormi de luce azura e giala, che le partiva fine e che man man che le se alsàva verso el çièl, le se slargàva, fin a fermarse tacade a qualche nuvola de passagio. 'Sti tubi de luce, movèndose tute insieme, i fasea un efèto terificànte, e i formàva de quei incròci, che i pareva dei quadri moderni. I èra i rifletòri de la contraèrea che çercàva de individuàr quel "stramaledèto calabròn", e qualche volta anca, i riussìva a individuarlo, e alora, tuti 'sti fari, i se concentrava e se vedea un zugatolèto argentàdo tuto inluminàdo che el pareva 'na croçeta; ma da quel che mi me ricordo, malgrado tute le canonàde che i ghe tiràva, non i l'a mai ciapàdo. ....L'è quà de sora,....No,.. el sarà sora Pescantina.... Ma va là , .l'è vignudo a bombardàr la stassiòn de Portanòva, parchè ieri l'è arivado da la Germania, un treno pièn de kruchi. ...Ma no,... el andarà a butàr la so pìrola sora Montòrio...... la gh'è n'a caserma.....Ma l'è ùda,.... i soldàdi iè scapàdi via tuti.....Ma cosa disito sù, .......le casermete i è piene de fasisti de la republichèta.....Cosa ghe scometèmo!.... E così, se andava avanti par dei quarti d'ora. Tuti i diseva la sua, e intanto incominçiàva le canonàde che partiva da dei postamènti de la contraerea che gh'èra tuto intorno a la çità, e da quel che me ricordo mi, de Pippo, non i è mai riussidi a tirarghene zo da le spese, gnanca uno. Nel çiel s-ciaràdo a giorno dai potenti rifletori, se vedea i foghi de le granate che scopiàva e che le lassàva de le nuvolete bianche e rosa, che ai nostri oci i parea i foghi artificiali. Par noialtri buteleti, l'èra quasi 'na festa a vedarli, ansi, non vedeimo l'ora che nostra mama la ne butasse zo dal leto par vèdar el spetacolo . Inveçe de scapàr zo in cantina dove gh'èra el famoso R.C.( Rifugio Casalingo), i omeni, con qualche fiòl,( e mi èra uno de quei ), i andava sui bastioni par assìstar a 'sto avenimento noturno .La çità non la se vedea più parchè gh'èra l'oscuramento, e parfin i fumadori non i podeva gnanca impissarse 'na sigareta, parchè se no el fogo del fiamifero l'avaria podudo segnalàr, la posision de la çità: se vedeva solo i rifletòri, se sentìa solo el rumor de le canonade e el ronzio de quel farabùto de Pippo. ...'Sta sera 1 otobre 2002, son vignùdo a savèr da un me corista, che a l'època el g'aveva diese ani, che Pippo, l'avea butado zo un spessòn incendiario che l' èra andado proprio sora 'na casa del quartier "Parigi" de Avesa, e l'omo che gh'èra dentro, l'è morto brusado dentro el so léto.

L'ASTUCIO VOLANTE
Quando ero a scola

……FA SILENSIO …"BORDEL".!!!!!Questo l'èra el titolo che el m' aveva rifilàdo el maestro Stefani, el primo giorno de scola e me lo son portado drio da la prima, fin a la quinta elementare. Quel titolo onorifico: "BORDEL" el me l'aveva afibiàdo par el timbro de la me voce, che za a siè ani l'èra baritona le che la tirava verso el basso. La classe I^ A, l'èra fata de un bataliòn de 40/ 50 buteleti, e gh'èra in meso anca dei buteloti da 10/11 ani, parchè con la scusa de la guera, i so genitori non i l'aveva mai mandadi a scola. El maestro Stefani l'èra un maestro tuto de un tòco e se anca la guera l'èra finida o quasi, el vegnea sempre a scola con i stivaloni del regime, fati de pele nera e lustradi de fresco. L'èra inamorado del balòn (oltre che de qualche maestrina so colega) e la magior parte de le lessioni le faseimo zo in corte a zugar e lù, metendoghela tuta, el fasea l'arbitro…….(L'èra proprio el caso de dir: arbitro fassista). L'umòr del maestro l'èra molto variabile, un giorno l'èra da òvi e un giorno l'èra da late,….un giorno el ne portava a zugàr al balòn e magari el giorno dopo l'èra catìo come 'na bestia e el ne butava tuti fora da la porta. Mi g'avea un astucio de legno a tri ripiani che el pesava al manco meso chilo e dentro gh'èra de tuto: penini, gome da cancelàr, matite nere e colorade, fa-punte, astine porta-penini, lamete vecie, elasticheti par ciapàr le mosche, el compasso, la pena stilografica de la prima comuniòn e altri strafanti che non me ricordo più. Un giorno mentre el stava insegnando l'aritmetica, el m'à visto ropetàr drio a l'astucio, ….el m'à adociàdo…. e el m'à dito:……..BORDEL !!! , …..pòrtame qua subito el to astucio che guardo anca mi cosa el ga dentro de così interessante! Mi ubidiente, ignaro e quasi orgoglioso del me astucio, gh'e l'ò portado e lù: …… Adesso va al posto…… e de corsa ! Apena ò messo el cul su la bancheta, (mi èra nel'ultimo banco de l'aula) ò visto el maestro che s'à alsado in piè e l'à lanciado el me astucio con la velocità de un proietile verso de mi, che se par combinassion non me sbasso el me cava via la testa dal col. Quando l'astucio l'à tocado el muro l'è scopiado come 'na bomba e tuto quel che g'èra dentro: penini, gome, pene e matite, le s'à sparse in tuta l'aula e tuti i me amiçi con le mane in testa e sconti soto i banchi, i çercava de difendarse dai mini-proietili che arivava da tute le parti, fasendo un casìn de la malora. El giorno dopo, ècolo che el ghe fa reçitàr a tuti quei de la classe, una comedia de Nadàl: Menon Giuseppe el faseva el S.Giusepe, FiIlippi Ubaldo el faseva la Madona , el più musso de la classe, che l'èra un buteloto de 11 ani e me par che el se ciamasse Prato, el faseva l'asino e el più mona el faseva el bò. Gesù bambin, l'èra , quel che adesso l'è el deputato Viviani e tuti i altri i faseva le pegore e i cani, mi èra stado incaricado de far el pastòr data la voce possente che me trovava. Questi i è i ricordi de la me infansia che s'avemo racontado a un pranso de rimpatriada dopo 45 ani, quando s'avemo trovado insieme al vecio maestro Stefani, che me digo, che anca se l'è za morto da diese ani, el ride ancora soto ai bafi.