L'antico Palio de Dante.
El Palio nato nel 1208 par festegiàr la vitoria del Comùn contro Azzo VI d'Este e i Sambonifacio, l'éra diviso in quatro gare: 1-dóne a pié / 2-òmeni a pié / 3-poaréti sui mussi / 4-nobili a cavàl. L'éra conossudo in tuta Italia, tanto che Dante el l'à messo parfin nel canto XV del'Inferno. Par descrìvar la corsa velocissima dei "danà" soto la pióva de fógo, l'à scrito: "....e parve di coloro a Verona il Drappo Verde per la campagna; e parve di costoro quelli che vince, non colui che perde". Le antiche corse i éra sancide dal Statudo de Alberto dela Scala e finansiade a spese del Comùn con schèi tiradi via dala cassa dele multe par dàrghelo ai palii. Premi: 1-dódese brassi de pano vérdo (dóne a pié) 2-dódese brassi de pano scarlado (òmeni) 3-una pèssa bianca de Valesio (poarèti) 4-una pèssa de veludo "cremisino". I vegnéa concorenti nobili da tuta Italia. Percorso: Porta S.Croçe (vissìn a porta Nòa), Porta Rofiolo, césa de San fermo. Soto i Venessiani l'à cambià date e percorso da la prima dominica de quaresima a l'ultimo de carneàl. percorso: Porta Palio, Corso Porta Palio (ciamado così parché i ghe coréa), la metà posta a Santa Anastasia. Arivo unico. Partense diverse: 1-done, Piassa Santa Apostoli, 2-òmeni, davanti a Castèlvècio, 3-mussi, difronte a césa de Santa Lussia a metà stradón Porta Palio 4-Cavai, Porta Palio. Porta Palio nel 1630 l'è stà serada par motivi de contagio (peste) e ciamada Porta Stupa, vèrta solo in ocasión del Palio. Col 
passàr del tenpo la corsa l'éra de dominica e i premi iè stà modificadi. Premi: 5 brassi de pano vérdo e rosso, 24 brassi de "valesio" bianco -25 brassi de veludo "cremisino". Premi de consolassión: per la corsa dei cavài i premi i éra du mèsi porsèi e un gal. Nel 1756 l'è stà deliberado de cOrar el Palio la prima dominica de majo par le mejo condissioni climatiche e la fiera. Con i Francesi nel 1796 l'è finìa la tradissión.